兩名被告人係被控第一項共同販運毒品罪，亦分別被控一項毒品份量較細嘅販運毒品罪，即係第二同埋第三項嘅交替罪。兩名被告都否認第一項控罪，但係就承認各自嘅販運毒品罪。控方決定不再起訴第一項控罪。
兩名被告分別都承認控方嘅案情撮要。簡單嚟講，兩名被告人喺案發當日嘅早上，喺香港國際機場辦理咗前往澳洲嘅登機手續之後，警方嘅毒品調查科警員將兩人截停，並在佢哋身上同埋鞋墊下面都發現到有毒品，警員於是將佢哋係拘捕。
在警誡下，第一被告透露，佢係收取咗50,000鈫報酬帶毒品入澳洲，而第二被告亦承認因為欠債，而幫個叫做「阿偉」嘅人帶毒品去澳洲。兩名被告喺後來嘅正式錄像會面時，都有進一步係作出招認。
咁毒品被檢驗後，證實係控罪所指嘅份量嘅「冰」毒。
第一被告現時就係62歲，有六次嘅刑事紀錄，但係並冇相同嘅販毒紀錄。佢以前係保安員，妻子同三名子女都係住喺內地嘅。
第二被告今年47歲，有三次嘅刑事紀錄，亦都係冇相同嘅販毒前科。佢以前做過清潔工人，佢係同佢丈夫分咗居嘅。
代表第一被告嘅陳大律師喺事前，已經將某一啲嘅求情，同求情有關嘅資料，係呈交咗畀法庭，清楚地列出被告所做過嘅事情。控方就指出，佢哋接納信中所提到嘅情況。陳大律師喺庭上補充，第一被告係因為經濟問題，被利誘而犯事，佢已經係非常後悔，佢知道要面對長時間嘅刑期，希望法庭盡量輕判，等佢亦都有機會可以見番佢嘅仔女。陳大律師向法庭建議咗刑期起點嘅計算，亦指出話第一被告應該得到多過三分一嘅減免。
第一被告人販運嘅係大概九百五十八克嘅「冰」。根據程國雄案例嘅指引，起點應該係18年以上。考慮過辯方嘅建議，同埋所呈上嘅案例之後，本席會以十九年半作為刑期嘅基準。
至於扣減方面，第一被告從被拘捕就一直表現合作，全面配合警方嘅調查，亦表示願意出庭作供，細節我唔喺呢度詳細說明喇。本席認為，第一被告應該可以得到一半嘅扣減，因此，刑期係九年九個月。
至於第二被告，梁大律師喺求情嘅時候指出，第二被告都係因為經濟壓力而犯案。就量刑方面，佢提出咗一個更低嘅刑期起點，亦都替第二被告要求有三分一嘅扣減。
第二被告所涉及嘅毒品有954克，份量同第一被告所差無幾。本席認為，十九年半係喺呢一類嘅犯案情況下恰當嘅基準。因此，對於第二被告嘅控罪，本席都係以十九年半作為刑期嘅基準。
喺扣減方面，第二被告原本打算提出不知毒品真正性質作為求情，但係最後喺控方可能提出嘅反駁證據下作罷。法庭喺呢個方面，其實亦都花費咗一啲嘅時間，本來可以唔畀足三分一嘅扣減。最後考慮到被告都係冇就此要求進行聆訊，咁所以本席決定都畀番佢全數三分一嘅扣減。咁刑期因此係13年。
法庭就會係喺呢度講明，就第一被告寫上嚟嘅嗰封保密信件，係會入好信封、打漆，同埋係講明，冇法庭許可之下，不得拆閱嘅。