被告承認一項強姦罪，違反香港法例第200章《刑事罪行條例》第118（1）條。
被告喺2008年嗰度從互聯網認識咗本案嘅受害人X，X係一名輕度弱智嘅人士，但係佢從來冇向被告披露自己嘅智商問題。佢哋相約見面之後喺交往期間曾經發生過性行為，但係喺2008年8月二人冇再見面喇，到咗2012年8月，當時X 20歲，被告再透過互聯網聯絡X，並且邀請佢去佢屋企，而當X去到被告屋企嘅單位內，被告同X喺客廳傾偈，之後就開始撫摸X，X有推開，並且表示要離去，但係被告強行將X抱入房，要X替佢口交之後將佢強姦，喺過程中被告冇使用安全措施。X離開之後並冇即時報警，但係後來因為擔心染上性病，向醫生求助之後搵社工幫忙報警。
被告現年25歲，冇刑事紀錄，喺案發之前係任職速遞。被告承認因為佢自己血氣方剛，一時衝動先至會干犯今次嘅罪行。對呢件事已經深感後悔，並且願意承擔法律嘅制裁。大律師續指佢喺過往幾年都有固定嘅工作，而僱主對佢嘅評價都不俗，希望今次嘅事件告一段落之後佢可以重新做人，希望法庭予以輕判。
根據臨床心理學家同埋感化官報告，被告嘅自我形象低，工作唔算穩定，但係沉迷上網，唔夠成熟去處理佢個人嘅需要。加上道德觀念薄弱，對性嘅態度開放。為咗一己私慾唔尊重他人嘅意願，先至會干犯今次嘅事件，令X淪為被告嘅洩慾工具。心理學家認為被告重犯性罪行嘅風險係不容忽視嘅。而根據X事後評估嘅創傷報告，心理學家話今次嘅事件令X感到莫大困擾，而被強姦過程嘅片段縈繞喺佢腦海中，令到佢失眠、憂慮，同埋感覺無助，佢覺得自己不潔，同埋不斷強逼性地成日洗手同埋沖涼，不過可幸嘅係今次事件令到X反思同埋加強警覺性，學習保護自己。
本席喺判刑嘅時候閱覽咗辯方所呈遞嘅求情信件，考慮到喺今次事件中被告所使用嘅武力係有限嘅，除咗冇使用安全措施之外，本案並冇其他令案情情節嚴重嘅因素。而被告第一時間認罪，免卻X作供重溫不快嘅經歷，顯示被告對事件係後悔同埋肯面對現實同埋承擔責任。本席認為一個6年嘅起刑點係合適嘅，予以認罪之後嘅三分之一扣減，判刑4年。另外被告因為認罪，免卻X出庭作供，額外扣減4個月，判刑三年八個月。