被告經審訊後，被裁定一項串謀犯搶劫罪罪名成立，本席喺判處嘅時候考慮咗案件嘅整體情況，包括案件嘅性質同埋情節，被告人嘅個人背景同埋辯方大律師嘅求情陳詞。
本案嘅情節可以簡述如下：2011年3月，被告人喺街上重遇一名相識嘅人林興，佢得知林興喺經濟上有困難，就相約見面，喺見面嘅時候，二人協議搶劫，手法係被告人進入銀行找尋適當嘅下手對象，然後告知喺外面等候嘅林興，林興就跟蹤嗰個對象，喺佢進入升降機嘅時候，用短刀打劫。案中有明確證據喺2011年5月至7月，共有四個日子，林興喺得到被告人通知邊個係目標之後，分別向四名女士行劫，三次得手，一次事敗。第一宗搶劫發生喺5月16號，事主損失咗大約兩萬元；第二宗搶劫發生喺6月13號，事主損失咗萬幾鈫；第三宗搶劫發生喺7月13號，事主損失咗大約兩千元；第四宗搶劫，事主冇金錢嘅損失，但係被箍頸、掩嘴同埋拳打咗頭部一下，並且被弄跌喺地上面。被告人同林興嘅協議就係搶得贓款之後會平均瓜分。
被告人現年37歲，中三程度，曾經任職運輸工人，事發嗰段日子擔任拆貨櫃嘅工作。被告人已婚，育有兩名兒子，另有一子一女，為前妻所出。被告人並非係初犯，佢嘅定罪紀錄大部分涉及不誠實嘅罪行，2001年，佢因為一項管有意圖用於非法用途嘅物品罪，被判社會服務令，但係最終因為違反社會服務令，被改判監禁3個月；2003年，因為一項以欺騙手段取得財產罪、一項使用虛假罪、四項盜竊罪同埋六項欺詐罪，共被判監禁42個月；2008年，因為一項管理賣淫場所罪，被判監禁6個月；2009年，因為三項盜竊罪，被判監禁共8個月。
被告人同林興二人喺兩個月之內分別向四名女事主下手，明顯被告人找尋嘅對象係身懷不少現金嘅單身女士。喺審訊嘅時候，林興出庭指證被告人。根據佢嘅證詞，每一宗案件，佢都有向女事主亮刀，雖然喺最後一宗案件嘅事主睇唔到有刀，不過本席冇理由懷疑林興嘅證詞。當時佢喺事主嘅後方動手，事主被施以武力，佢驚惶失措，留意唔到林興有刀並不出奇。林興亦都話雖然被告人了解佢嘅背境，知道佢懂得如何行事，不過喺第一宗搶劫之前，被告人將一把刀交咗畀佢。本席認為林興喺搶劫嘅時候會用刀，同埋喺需要嘅時候動武，必然係被告人預期之內。
喺審訊之前，林興已經就最早發生嘅三宗劫案，喺另外一位法官席前認罪，被判監禁6年。林興嘅刑事定罪紀錄係非常之差，曾經多次搶劫。
本席認為，以本案嘅性質同埋情節，和被告人喺案中嘅角色，應該採用九年作為量刑基準。喺審訊嘅時候，被告人不單只冇承認控罪，更加出庭作證，指稱林興誣衊佢，因此不見被告人有半點悔意。
本案有特別之處，就係被告人受審嘅時候，林興出庭指證佢，但係喺另一方面，喺林興被捕之前，被告人曾給予警方一啲協助，呢一點喺審訊嘅時候，控方第七證人，嗰名警員喺被盤問嘅時候亦都確認咗。林興喺犯案嘅時候戴上口罩，案中事主亦都冇一個人可以認得賊人。
此外，本席亦都顧及咗一啲文件上面嘅資料。
考慮咗整體情況，本席認為可以給予被告人6個月嘅刑期扣減。被告人，請起立，基於上述理由，本席判你就本案監禁八年半。