香港特別行政區 訴 鍾翹亦
|
HCCC 350/2013 香港特別行政區 高等法院 原訟法庭 刑事案件2013年第350號 ----------------
----------------
---------------------- 判刑 ---------------------- 官： 被告係被控一項販運毒品罪，涉及毒品係0.92公斤嘅氯胺酮。被告係承認控罪同埋同意控方嘅案情撮要。 簡單嚟講，被告喺2012年12月23日下午嘅時間，係被警員截停搜查，咁喺佢攜帶嘅袋裡面係搵到控罪所指嘅毒品。 在警誡下，被告係坦白承認話，佢係因為需要錢，而幫人運毒嘅。喺後來嘅錄影會面之中，被告進一步透露咗交收毒品嘅細節。 被告今年21歲，係香港出生，以前做過運輸嘅工作，月入有大約九千鈫。佢未婚，同家人係住喺黃大仙嘅。 代表大律師喺求情嘅時間提到，被告係有專注力不足嘅症狀，咁所以就算會考嘅時間，都未能夠取得任何嘅分數。 被告自己同家人亦都有呈上咗一啲嘅信件，係求情信嚟嘅。咁被告嘅母親特別提到，佢9歲嘅細女患有過度活躍症；佢亦都提到，其實被告幼年嘅時間，似乎都有相同嘅問題，但係佢當時就唔識得處理，令到被告同家人嘅關係比較疏離，因此一啲嘅損友係有機可乘。 根據案例指引：Secretary for Justice v Hii Siew Cheng（[2009] 1 HKLRD 1），呢個數量嘅毒品係屬於12至14年嘅範疇。考慮到毒品嘅呢個數量，本席係會以13年作為刑期嘅起點。本席會因為被告承認控罪，而扣減三分之一。刑期會變成係八年八個月。 上訴庭已經多次指出，針對販毒案呢一類嚴重嘅罪行，年紀輕及冇刑事紀錄就並不構成有效嘅求情因素。喺本案嚟講，被告來自一個正常嘅家庭，佢自己並非吸毒者，雖然成績唔好，都盡力去參加會考，亦接受建造業嘅訓練，本席都相信佢唔係話嗰啲無藥可救嘅販毒人士。被告相對都係年輕，以往冇刑事紀錄，第一次係面對比較長時間嘅監禁，亦都考慮到佢嘅家庭背景同家人嘅情況，本席係會酌情將刑期再減8個月。 今次被告面對嘅監禁刑期會係頗長嘅一段時間，但亦都可以視為畀被告反省同埋再學習嘅機會，懲教署近年都積極注重呢個在囚人士嘅復康同埋職業訓練。我希望被告喺失去自由嘅同時，能夠痛定思痛，可以嘅話係再讀書、進修，同埋搵到適合自己嘅訓練課程去參加。喺刑滿之後，社會上亦有幫助釋囚人士嘅機構，可以協助佢係重新立足喺社會。希望被告珍惜法庭額外扣減呢8個月嘅鼓勵意義。香港更加需要係嗰啲腳踏實地去工作嘅人，而唔係嗰啲想一步登天嘅人士，亦都希望被告嘅家人係可以繼續支持佢去改過。 因此，刑期係8年。 |