被告人喺裁判法院承認咗一項販運危險藥物罪，被交付高等法院原訟法庭判處。今日被告人喺本席席前再次承認控罪，同意案情，本席確認被告人控罪罪名成立。
本席喺判處嘅時候，考慮咗整體情況，包括案件嘅性質同埋情節，尤其是係所涉嘅危險藥物嘅種類同埋份量、被告人嘅個人背景同埋辯方大律師嘅求情陳詞。
本案嘅案情可以簡述如下：被告人喺落馬洲管制站入境大堂被截停，喺搜身嘅時候，發現被告人嘅褲子裡面有一個啡色嘅信封纏繞咗喺佢嘅右邊大腿，信封裡面係海洛英。被告人承認佢為咗3,000元嘅報酬，從內地將一啲毒品帶嚟香港。被告人販運嘅係內含0.27公斤海洛英鹽酸鹽嘅0.34公斤磚狀固體，價值二十七萬多元。
本席得知被告人現年57歲，初中教育程度，曾當木工，現在已退休，間中走水貨賺取金錢。他結過兩次婚，第一次婚姻育有一對女兒，第二任妻子本人有兩名兒子，被告人同佢冇其他嘅子女。被告人有一次嘅刑事定罪紀錄，不過同危險藥物無關，只係喺2001年因為一次賭博罪被判罰款，本席喺判處嘅時候，不會理會呢一項紀錄。
辯方大律師喺陳詞嘅時候強調，被告人有真誠悔意，佢指出被告人現任妻子嘅兩名兒子已經嚟到香港定居，但係未能夠找到工作，要倚靠被告人。被告人因為患有高血壓，健康欠佳，加上教育程度不高，所以未能找到工作，被告人係喺沈重嘅經濟壓力之下犯案嘅。喺被捕之後，被告人與警方合作，坦誠承認咗控罪。被告人嘅女兒亦都為被告人撰寫求情信，指出被告人係心地善良，負責任嘅父親，亦都表示會支持佢。
被告人今次販運嘅係海洛英，毒品含量並不少，有0.27公斤。根據上訴法庭嘅案例英皇訴劉德明（[1990] 2 HKLR 370），販運海洛英者，如果毒品含量係200至400克嘅話，應該判處監禁12至15年，本席睇唔到喺本案存在應該偏離量刑指引嘅因素。被告人將毒品從內地帶嚟香港，係加重刑責嘅因素，量刑基準應該提高9個月。考慮咗整體情況，本席採用十三年九個月作為量刑基準。被告人承認控罪，應該得到三分一嘅刑期扣減，考慮咗整體情況，本席認為呢個就係被告人應該得到嘅刑期扣減幅度。
被告人，請起立。基於上述理由，本席判你監禁九年兩個月。