被告人吳志楠被控一項販運危險藥物罪，係違反香港法例第134章《危險藥物條例》第4（1）（a）及（3）條，佢喺本席前承認控罪之後，本席將佢定罪，佢又承認咗由檢控官備就嘅案件撮要。佢承認個案情撮要如下：
2013年1月24日，警方喺九龍土瓜灣土瓜灣道383號翔龍灣翔龍灣廣場一帶進行反毒嘅行動。約於23：30時，警方發現被告人，佢身上孭住一個黑色嘅斜孭袋進入該廣場內嘅一間「7-11」便利店，警員11700同埋11687進入該「7-11」便利店，喺店內截停被告人，並帶佢去店外調查。警員11700喺被告人身上孭住嘅黑色斜孭袋裡面搜出：一，一個維他檸檬茶盒，內藏有一個透明可再封口嘅膠袋，其中載有白色嘅粉狀固體，思疑係危險藥物；同埋二，一個電子磅。
警員11700以販運毒品罪名拘捕被告人。經警誡之後，被告人話「明白，阿Sir，啲『K仔』我幫朋友拎過嚟畀人㗎咋」。搜獲嘅懷疑危險藥物其後被送去政府化驗所化驗，證實為內含160克氯胺酮嘅190克固體，該危險藥物喺當時嘅市面零售價估計為港幣22,990鈫。
被告人現年44歲，喺香港出生，被捕之前同佢嘅母親、姐姐同埋一個兩個月大嘅女兒同住於馬鞍山一個屋苑嘅單位，即是被告人係已婚，其妻子同埋而家係十三歲半大嘅女兒係居於馬來西亞，被告人有一個女朋友為佢誕下頭先講嗰兩個月大，而家係歲半大嘅女兒，同埋一個係而家係兩歲半大嘅兒子，女朋友同埋兒子係居於順利邨。被告人曾經任職多種行業，被捕之前係的士司機。佢有數項刑事記錄，但係所犯嘅並非嚴重嘅罪行，唯一與毒品有關嘅刑事記錄係2010年12月6日被定罪嘅管有吸毒用具，當時係罰款2,000鈫嘅。喺較早前喺2010年9月1日，佢係被判傷人罪，刑罰係包括入獄兩個月緩刑3年，故此，喺干犯本案嘅時候，佢係喺該3年緩刑期限之內，要注意嘅就係2010年12月6日判刑嘅時候，法庭係冇命令執行該緩刑嘅兩個月監禁，冇記錄係解釋呢個唔執行緩刑嘅原因。
喺本案，代表被告人嘅關大律師向本席遊說唔好執行個緩刑嘅監禁，因為被告人已經遵守咗該緩刑令嘅大部分嘅時限，本席認為喺呢個情況之下，係可以寬大處理嘅，所以本席喺量刑嘅時候唔會對該等刑事記錄加以理會，即係唔會以被告人嘅刑事記錄而加重刑罰，然而被告人本身同埋家庭狀況喺販運毒品咁嚴重嘅罪行之中，對輕判或者係扣減刑罰並不起任何作用，唯一嘅減刑因素就係佢坦誠認罪，係最有效同埋有力嘅減刑因素嚟。
根據律政司訴許守城（[2008] 3 HKC 323）一案裡面，上訴法庭定下關於販運氯胺酮嘅判刑指引，涉及販運氯胺酮嘅重量為50至300克者，判刑應為6至9年監禁，以本案涉及嘅160克氯胺酮，本席認為喺本案嘅情況之下，適當嘅量刑基準應該係七年三個多月嘅監禁，因為被告人認罪，本席給予一貫嘅三分之一嘅刑期扣減，扣減之後刑期應約為四年十個月監禁。
基於上述原因，本席判處被告人入獄四年十個月。