香港特別行政區 訴 沈小瑜

HCCC 354/2013

香港特別行政區

高等法院

原訟法庭

刑事案件2013年第354號

----------------

----------------------

判刑

以下內容乃法庭數碼錄音謄本

----------------------

官：　

本案被告人沈小瑜承認兩項控罪，都係販運危險藥物罪，違反香港法例第134章《危險藥物條例》第4（1）（a）及（3）條。

第一項控罪詳情指被告人於2013年4月5日在香港九龍旺角通菜街105號6樓B室（以下我稱為「該住址」）非法販運危險藥物，即內含145.80克氯胺酮嘅185.58克粉末。第二項控罪詳情指被告人於2013年4月5日，同日，在香港九龍旺角通菜街105號6樓非法販運危險藥物，即內含2.07克氯胺酮的2.63克粉末。被告人亦都承認咗控方所備就嘅本案案情。

案情好簡單。2013年4月5日晚上，警方人員喺通菜街一帶執行掃毒行動，於21點48時，警員見到一個女子到達該住址嘅閘門外，與被告人談話數秒鐘後離去，警員尾隨該女子至通菜街97至99號地下外，將佢截停，並且喺佢所攜帶嘅手袋之中搜出一個內藏懷疑毒品嘅膠袋，後經驗證，就係第二項控罪所涉嘅毒品。被拘捕後，在警誡下，該女子說該膠袋內嘅「K仔」（即是氯胺酮），係佢喺通菜街105號6樓從被告人（咁佢講出咗被告人嘅全名）買來自用。於同日22點12時，警員見到另一名女子上樓到達該住址嘅閘門外，被告人開門，於是警員表露身分，並進入該住址執行搜查令。除咗被告人之外，該住址裡面有一個男子（後得知係被告人嘅男朋友），警員從該住址位於客廳嘅一個黑色櫃之中搜出幾樣嘢：一，一個咖啡色嘅化妝袋，內有十五包懷疑毒品，後經驗證，乃第一項控罪所涉嘅毒品，即內含145.80克氯胺酮嘅185.58克粉末；第二，一啲空嘅透明可再封口嘅膠袋；第三，三個電子磅、一隻匙羹同埋紙盒，經驗證之後，發現係染有微量可卡因同埋氯胺酮嘅粉末；第四，一個內有港幣600鈫嘅現金錢箱。喺警誡之下，被告人承認佢兩天之前，從一個叫做阿強嘅人，以9,600鈫買咗八袋氯胺酮，並且係用電子磅同埋匙羹等嘅工具，將毒品分裝為小包出售。佢喺2013年4月4日賣咗一啲毒品畀人，共賺咗400鈫，亦都賣咗第二項控罪所涉嘅毒品畀先前已經被警方拘捕嘅女子，收咗200鈫，呢啲就係放喺錢箱裡面嗰600鈫喇。其後，被告人承認佢係該住所嘅租客。

案中撿獲嘅毒品，零售價估計為港幣22,396鈫。

根據律政司訴許守城（[2008] 3 HKC 323）嘅一案之內，上訴法庭訂下關於販運氯胺酮嘅判刑指引，涉及販運嘅氯胺酮嘅重量超過1克而至到10克，應判處就係兩至四年嘅監禁，而達至50克至到300克，應判處6至9年嘅監禁。本案第一項控罪涉及販運嘅危險藥物係內含145.80克嘅氯胺酮嘅185.58克嘅粉末，本席認為適當嘅量刑基準應該係七年半監禁。第二項控罪涉及販運嘅危險藥物係內含2.07克氯胺酮嘅2.63克粉末，本席認為適當嘅量刑基準應該係兩年半監禁。

本案所涉嘅罪行係極其嚴重，被告人嘅自身同埋家庭嘅狀況，對於輕判或者扣減刑罰，並不起任何作用，只有一個減刑因素，就係佢承認控罪，因此被告人應獲通常三分之一嘅刑期扣減，扣減之後，第一項控罪嘅刑期應為5年監禁，而第二項控罪嘅刑期應為一又三分之二年嘅監禁，因為兩件控罪密切相連，而涉及嘅危險藥物嘅總重量共為147.87克，冇超過許守城案應判處6至9年監禁所涉及嘅氯胺酮嘅重量50克至到300克嘅範圍，因此本席命令，兩項控罪嘅刑期同期執行，被告人係被判處嘅總刑期係5年監禁。