香港特別行政區 訴 葉祖榮
|
HCCC 103/2013 香港特別行政區 高等法院 原訟法庭 刑事案件2013年第103號 ----------------
----------------
---------------------- 判刑 ---------------------- 官： 本案被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，警員喺西九龍中心嘅停車場出入口外截停被告，進行搜身，發現佢腰包中有一個煙盒，入面有四袋嘅「冰」毒。佢喺警誡下，聲稱佢因為準備結婚，為賺錢而替人販運「冰」毒，可以賺取500元。 毒品經過化驗之後，證實為12.07克晶狀固體，內含11.65克甲基苯丙胺鹽酸鹽。 被告現年34歲，有十七項嘅刑事紀錄，曾經牽涉過普通嘅管有危險藥物，2007年，同埋最後一項係喺2011年12月22號，因為販運危險藥物而被判入獄，總數係16個月。佢喺2012年8月獲釋，而本案係喺獲釋之後三個月干犯嘅。 大律師喺求情嘅時候表示，被告自年幼嘅時候已經受損友影響，染上毒癮，曾經被家人送往外國，希望能遠離該批損友戒毒，可惜回港之後又重墮毒海。後來亦都曾經試過短暫參與一啲海外嘅戒毒療程，但係回港之後仍然不果。 大律師又指，本案涉及一共四包嘅毒品，當中有三小包係佢準備購入自用嘅，但係由於受到毒販嘅引誘，向佢表示事成之後，可以再從大包毒品內分3克毒品給予佢，佢意志唔得堅定，先至犯下本案嘅。 本席喺量刑嘅時候考慮咗本案嘅案情、毒品嘅種類、重量、有關嘅量刑指引、被告認罪、大律師嘅求情，亦都閱覽咗被告所撰寫嘅求情信。 大律師求情嘅時候指，嗰三小包毒品係被告自用嘅，而嗰三小包毒品根據政府化驗師嘅報告，分別係涉及0.56克、0.18克及0.18克嘅毒品，即係總數為0.92克毒品，而該包大嘅毒品分別就係10.73克嘅毒品。 本席考慮咗黃雪侯（譯音）一案中所指，喺判刑嘅時候，假如被告聲稱有部分嘅毒品係佢自用嘅時候，法庭需要考慮嘅因素。喺本案所有嘅毒品總重量係11.65克，而當時嘅市值係8,642鈫，啲毒品全部喺被告身上搵到嘅。被告之前曾經係有管有危險藥物，但亦都有販運危險藥物嘅刑事紀錄，須知黃雪侯一案所指嘅係法庭必須考慮所有因素，並滿意係有不少份量嘅毒品係自用嘅，先可以喺量刑嘅時候有所反映。 喺本案中，除咗被告自稱嘅情況之外，並冇呢方面嘅證據，而該三小包相對於大包嘅毒品份量亦都唔算係significant portion。 本案嘅「冰」毒根據量刑指引，係納入10至到70克，即係起刑點係7至到10年，本席考慮到被告係喺上一次監禁獲釋不久即干犯本案，喺綜合所有嘅因素之下，認為一個七年半嘅起刑點係合適嘅，予以三分之一嘅量刑扣減，判刑5年。 |