香港特別行政區 訴 陳敬瑋

HCCC 80/2014

香港特別行政區

高等法院

原訟法庭

刑事案件2014年第80號

----------------

----------------

----------------------

判刑
以下內容乃法庭數碼錄音謄本

----------------------

官：　

被告係被控一項販運危險藥物罪，涉案嘅毒品有兩類，即係22.49克嘅「冰」同埋6.33克嘅海洛英。

被告係承認案情。

簡單嚟講，警務人員喺案發當天嘅黃昏時間，喺上海街進行調查，之後喺控罪所指嘅位置截停咗被告，同埋喺佢身上搵到有關嘅毒品同埋電子磅，仲有一啲嘅空膠袋。警方於是就拘捕被告。

被告今年31歲，以往就有刑事紀錄，但係就並不涉及毒品。佢以前係裝修工人，佢自稱都係一名吸毒者。

就判刑方面，本席已經參考過代表大律師所呈上嘅案例，本席同意就係「冰」毒呢個部分，刑期起點應該係七年半，至於海洛英方面，因為數量唔算係太多，辯方都同意可以簡單用向上調整嘅呢個處理方法，陳大律師認為，佢建議就係話上調半年至一年係適合嘅幅度。

本席經考慮後，係會以8年作為整項控罪嘅刑期基準，本席會給予被告全數三分一嘅扣減，因此刑期係五年四個月，本席再睇唔到有其他可以減刑嘅因素。

本席想多口講一句，就係話被告今年係31歲，唔再係年輕，亦都唔係話年紀大，我希望經過今次之後，你能夠係重新做人，唔好再要屋企人奔波嚟到去探你，又睇住你去坐監。