香港特別行政區 訴 黎明治

HCCC 118/2014

香港特別行政區

高等法院

原訟法庭

刑事案件2014年第118號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人係被控一項販運毒藥物罪。

控罪係涉及兩類嘅毒品，即係6.59克嘅「冰」毒同埋95.67克（俗稱嘅「K仔」）嘅毒品。被告人係承認控罪，亦都同意有關嘅案情。

簡單嚟講，喺案發當天，警方人員喺通菜街一個大廈裡面係截停咗被告。警員之後同被告進入控罪所指嘅單位進行搜查，最後喺被告嘅房間搵到有關嘅毒品。在警誡下，被告承認係為咗金錢而去販毒，而其餘喺單位裡面嘅都只係佢嘅朋友。有關嘅毒品，市值大約係港幣萬八鈫。

代表大律師喺求情嘅時間指出，被告今年25歲，咁被告係冇刑事紀錄嘅。佢有不幸嘅家庭背景，佢以前都有正當嘅工作，但係因為想考地產代理嘅牌照，所以辭工，專心讀書，而喺呢個時間，佢母親病發，被告係要面對經濟壓力，喺損友嘅影響之下，所以係犯案。

辯方亦都呈上咗多份求情信件畀法庭參考，包括被告人自己寫嘅信，佢母親、佢女朋友、牧師等等寫嘅信件。本席理解佢哋係出於愛被告而為佢求情，但係法庭要關注嘅係被告嘅販毒行為係對社會帶嚟咗極大嘅遺害嘅。

喺判刑方面，本席參考咗有關嘅案例，尤其係Wan Lau Mei，呢個係譯音，（CACC 389/2013年）及Wong Kin Kau，都係譯音，（[2010] 4 HKC）。就6.59克嘅「冰」毒，根據案例嘅指引，判刑應該喺3至到7年之內；咁至於話95.67克嘅「K仔」，根據案例指引，判刑應該係喺6至到9年。

代表大律師提出，就「冰」毒嘅份量，刑期起點唔應該超過5年。至於「K仔」方面，刑期起點唔應該超過7年。而整體刑期方面，則不應超過8年。本席係考慮後，基本同意大律師嘅分析，「冰」毒嘅部分，本席會以5年為基準；「K仔」部份，本席會以7年為基準。

本席如果以「K仔」嘅份量呢個角度嚟到衡量整體刑期基準，應該會係高過代表律師所提出嘅8年。但經考慮後，本席最後決定都係以「冰」毒嘅5年作為基準，然後作出上調。本席同意合適嘅整體刑期基準應該係8年。喺呢一方面，其實法庭已經係採納咗對被告較為有利嘅處理。本席會給予被告三分一嘅減免，因此刑期會係五年四個月。但係除左呢個求情因素之外，本席就睇唔到再有其他可以減刑嘅因素喇。

被告喺佢母親有病嘅時間要面對監禁，對全家人嚟講必定都係會有極大嘅打擊。但係希望被告能夠謹記今次嘅教訓，刑滿之後可以係重新做人。希望佢記得如果佢自己唔接受引誘，冇人可以帶壞佢嘅。