香港特別行政區 訴 黎小麗

HCCC 137/2013

香港特別行政區

高等法院

原訟法庭

刑事案件2013年第137號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人係被控一項販運危險藥物罪，佢否認控罪。在審訊之後，陪審員係以五比二之數，裁定被告罪名成立。涉案嘅毒品係0.78公斤嘅海洛英鹽酸鹽，與及0.18公斤嘅單乙酰嗎啡鹽酸鹽。

被告今年29歲，係內地人，有受過大專程度嘅教育，佢喺廣州一直有工作。喺2012年中佢話轉替一名叫做Kelvin（?）嘅非洲籍人士工作，主要係由國內去外國，帶衣物嘅樣本返去中國。佢話今次係佢第二次出國，而行李篋係住喺馬來西亞嘅另一名非洲籍男子係替佢安排，然後帶上飛機，嚟到香港嘅。

被告嘅辯護係佢唔知道行李篋裡面嘅暗格收藏咗毒品。好明顯，陪審員並不接納被告人嘅講法，而最後係判佢罪名成立。本席亦要根據陪審員嘅裁決，去考慮判刑。

本案涉及嘅有比較常見嘅海洛英鹽酸鹽，亦有另一種6-單乙酰嗎啡鹽酸鹽。政府化驗師嘅證明書指出，後者係一種嗎啡酯鹽。控辯雙方喺呢個階段就不爭議作為判刑基礎，兩種毒品嘅性質應該係相等。

本席已經閱讀過另一位原訟庭法官嘅判刑理由，即係HCCC 265/2011年HKSAR v Kharim Omari，該案其實都係處理咗相同嘅問題嘅。喺呢個基礎上，本席要考慮嘅有效毒品嘅份量就變成係相等於960克嘅海洛英鹽酸鹽。根據案例，除咗毒品嘅份量，法庭需要考慮到案件是否涉及國際販運嘅呢一個加刑因素，好明顯，本案係有呢一項因素嘅。

在考慮後，本席決定以22年作為刑期起點，呢一個已經係包括咗半年因為國際販運因素嘅向上調整。就本案嘅情況而言，本席係睇唔到有任何嘅求情或者係減刑嘅因素，因此，判刑係22年。

有關向上訴法庭提出的相關上訴，請參閲CACC22/2014。