被告人喺裁判法院承認咗一項販運危險藥物罪，被交付高等法院原訟法庭判處，今日被告人喺本席席前再次承認控罪，被裁定該項控罪罪名成立。
喺判處嘅時候，本席考慮咗案件嘅整體情況，包括案件嘅性質同埋情節，尤其是所涉危險藥物嘅種類同埋份量、被告人嘅個人背景同埋辯方大律師嘅求情陳詞。
本案嘅案情可以簡述如下：被告人喺街上面被警員截停，喺搜查之下，喺佢嘅手袋發現咗一個膠袋，內藏氯胺酮，亦都喺佢嘅牛仔褲褲袋發現一包氯胺酮。喺被告人身上發現嘅危險藥物，總份量係內含173.14克嘅氯胺酮嘅253.63克粉末。
被告人現年43歲，中三程度，曾經喺工廠同埋酒樓工作，亦都曾經喺夜總會任職至主任，2003年因為一宗嚴重交通意外受傷，之後轉行任職收銀員，喺2010年開始無業，被告人嘅父親已經去世，佢同母親同住喺一個公屋嘅單位。被告人係初犯嘅。
辯方陳聰大律師喺陳詞嘅時候強調，被告人係第一時間認罪嘅，亦有真誠悔意而且係初犯嘅，並且指出被告人今次愚蠢地犯案係因為一個特殊嘅背景。當被告人喺夜總會工作嘅時候收入不俗，不幸喺2003年遇上嚴重車禍，受咗重傷，亦都因為後遺症未能夠繼續喺夜總會擔任原有職位，佢之後依然自食其力，任職收銀員，但係收入大減，加上因為車禍，令到佢唔可以再生育，因而患上抑鬱症。雪上加霜嘅就係被告人就嗰宗意外所得到嘅1,000,000元賠償喺扣除種種開支之後只係剩番大約一半，佢用呢一筆餘下嘅金錢同男朋友買咗一層樓，但係冇加上自己嘅名字，最終因為男朋友瞞住佢將層樓賣咗，令到佢失去咗呢一個財產，之後被告人自己亦都失咗業。喺種種打擊之下，佢沉淪毒海，喺咁嘅情況之下，佢為咗應付將快到嚟嘅農曆年嘅開支，被告人喺購買危險藥物嘅時候受唔住誘惑，為咗1,000元微薄嘅酬勞，愚蠢咁樣應承幫人販運危險藥物，干犯咗本案。干犯本案之後，被告人感到被家人離棄，不過今日佢嘅母親都為佢寫咗一封求情信，被告人亦都向法庭撰寫咗一封信，裡面盡表悔意。
根據律政司司長訴許守城[2009] 1 HKLRD 1一案，販運氯胺酮者，如果毒品嘅純含量係50至300克嘅話，應該考慮判處6至9年嘅監禁，本席不認為案中存在足可偏離量刑指引嘅充分理由。本席亦都顧及上訴法庭喺英皇訴劉德明[1990] 2 HKLR 370一案裡面指出，法庭喺量刑指引嘅範圍裡面決定適當嘅量刑基準嘅時候，應該考慮案中所有相關情況。
本席認為以本案嘅情況嚟講，採用七年三個月作為量刑基準係合適嘅，足以反映案件嘅嚴重程度。被告人初犯，亦都承認控罪，應該得到三分一嘅刑期扣減。除此之外，顧及陳大律師盡責稱職嘅求情陳詞所述，本席給予被告人多一個月嘅刑期扣減。
被告人，請起立，基於上述理由，本席判你就本案監禁四年九個月。