香港特別行政區 訴 畢國維

HCCC 211/2014

香港特別行政區

高等法院

原訟法庭

刑事案件2014年第211號

----------------

----------------------

判刑

以下內容乃法庭數碼錄音謄本

----------------------

官：　

被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，警員喺聯合道睇到被告與另一男子形跡可疑，將佢哋截停，查問被告點解雙手抱住腹部，被告鬆開雙手，四包毒品掉在地上。喺警誡之下被告冇說話，佢現在承認毒品係佢替人運送嘅，毒品經過化驗之後證實為1.91公斤粉末，內含1.51公斤嘅氯胺酮。毒品總數量當時嘅零售價為港幣236,840元。

被告現年20歲，2012年2月嘅時候因為意圖搶劫而襲擊他人同埋搶劫罪，被判到勞教中心服刑，佢喺2012年7月10日服刑完畢。大律師喺求情嘅時候表示，被告係因為幫助朋友還債先至干犯本案，而佢並未有收取任何報酬。大律師亦都強調，被告本質不壞，只不過一時愚蠢先干犯本案，亦都已經深感後悔，故此喺第一時間認罪，彰顯悔意，希望本席體諒，從輕發落，好讓佢刑滿出獄之後仲能夠陪伴年事已高嘅祖母。

本席喺量刑嘅時候考慮咗本案嘅案情、毒品嘅種類、重量、量刑指引、被告認罪、大律師嘅求情，亦都閱讀咗被告以及佢嘅家人所撰寫嘅求情信。

根據許守城案嘅量刑指引，販運1,000克以上氯胺酮嘅起點係由14年起。本案牽涉嘅1.51公斤嘅氯胺酮，本席採納15年嘅起刑點，予以三分之一嘅認罪扣減，判刑10年。