香港特別行政區 訴 羅海富

HCCC 408/2012

香港特別行政區

高等法院

原訟法庭

刑事案件2012年第408號

----------------

----------------

----------------------

判刑
以下內容乃法庭數碼錄音謄本

----------------------

官：　

被告喺聆訊之後被裁定一項販運危險藥物罪，罪名成立。

案情指佢喺2012年8月7號被警員喺芝蘭樓外截停，期後搜身期間，發現佢身上頭盔內，頭盔內嘅梳嘅暗格內一共藏有三包毒品。毒品經過化驗之下，證實為內含25.29克甲基苯丙胺鹽酸鹽嘅26.72克晶狀固體。

根據被告嘅刑事紀錄有十一次案底，最後一次係喺2014年4月11號，因為管有危險藥物同埋攻擊性武器等，共被判刑12個月，而該案係喺本案擔保期間干犯嘅，佢喺1987年亦都曾經試過有一次販運危險藥物嘅案底。

根據大律師嘅求情，被告現年49歲，已經離婚，個女兒19歲，係同媽媽同住。大律師指，紀錄顯示被告人1987年販運危險藥物罪嘅案底距今久遠，而佢嘅案底亦都顯示，事實上係自96年至本案2012年發生期間並冇再犯事，希望本席盡量予以輕判。

本案涉及25.29克嘅「冰」毒，根據程國雄一案，販運10至到70克，起刑點係7至到10年，本席自然係有考慮到佢因為喺2013年干犯管有危險藥物罪同埋管有攻擊性武器被判監10個月，但不容忽視嘅係本案係喺該案擔保期間干犯，理應係全數分期。

考慮所有嘅因素，本席以七年半作為本案嘅起刑點，不予以任何扣減，判刑七年半，同佢現在所服刑嘅刑期分期執行。