香港特別行政區 訴 Gongsaen Jeerawun
|
HCCC 450/2013 香港特別行政區 高等法院 原訟法庭 刑事案件2013年第450號 ----------------
---------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 被告係泰國公民，佢乘搭肯亞航空公司飛機由非洲內羅比抵港入境嘅時候畀關員截查，從佢兩個背囊其中一個暗格位發現兩包用錫紙包裹嘅物體，內載有危險藥物。有關嘅毒品化驗之後，證實為內含1,984.21克甲基苯丙胺鹽酸鹽嘅1,995.64克晶狀固體，當時嘅市值大概係一百五十四多萬元。 被告喺警誡下指佢從曼谷出發，經越南、香港到肯亞莫三比克，旅費同埋電話費由他人支付，以及獲得500鈫美金作零用，佢現在承認佢係替人運送該些毒品經香港再前往越南及柬埔寨返泰國，佢喺返到曼谷之後會獲得報酬。 被告人現在係24歲，以往並冇刑事紀錄。 大律師喺求情嘅時候表示，被告喺泰國認識咗一位哥倫比亞籍嘅男朋友，受騙到莫三比克旅行，結果替他人運送毒品經香港到柬埔寨。大律師指，被告並不知犯此案嘅後果嚴重性先至會鋌而走險，希望本席考慮到本案係發生喺譚伊真案頒下新指引之前而沿用過往嘅量刑方法，以及給予被告最大嘅認罪扣減。 本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪、大律師嘅求情，亦都閱讀咗被告所寫嘅求情信。根據譚伊真一案，就販運多過600克嘅「冰」毒嘅量刑指引係沿用Abdallah一案就販運海洛英鹽酸鹽嘅指引，即係1,200至到4,000克起刑點係23至26年。譚伊真案嘅頒布日期係2014年6月9號，上訴庭表明發生喺該案頒布日期後嘅案件應該沿用新嘅指引釐定起刑點。本案係發生喺2010年9月18號，即係譚伊真案頒布日期之前，而譚伊真案本身係涉及1,916克嘅「冰」毒，上訴庭認為未有新指引之前，應該以二十二年半作為起刑點，並就國際性因素加刑兩年，即係二十四年半作為審訊後定罪嘅量刑基準。本席亦都以二十四年半作為本案審訊後定罪嘅量刑基準。 考慮到本案嘅審訊歷史，上訴人係喺首次李法官席前不認罪經過審訊之後定罪，上訴定罪得直發還重審先至認罪，故此不能說是第一時間認罪。考慮咗吳永光同埋崔志偉（譯音）案，本席只係給予四分之一嘅認罪扣減，判刑220個月（十八年四個月）。 | ||||||||||||||||||||||