被告人喺聆訊首天認罪，本席曾經考究過呢個是否屬於第一時間嘅認罪，因為過往而言，法庭給予被告認罪三分之一嘅扣減係顯示被告人坦白同埋悔意係得到法庭嘅認可以及鼓勵，另外一方面，鼓勵被告盡早認罪亦都令法庭堆積如山嘅案件嘅排期得以舒緩，呢個係一貫嘅共識，然而此政策難免係會受到濫用，以致好多時候被告人係選擇喺審訊首天先認罪，白白浪費咗法庭其他預留作審訊嘅日期，呢種情況尤其是喺近期嚟講並不罕見。事實上，一般嘅共識同埋案例所講嘅係timely plea，當然以前亦都有案例指出聆訊首天認罪仍然可算係第一時間認罪，有別於喺審訊第三、第四天或者喺案中案完結之後嘅認罪，然而上訴庭亦都講過三分之一嘅認罪扣減並非甚麼一成不變嘅金科玉律，不過喺Cross & Cheung 2015年版一書第26章係咁講嘅： “Even a late plea avoids the needs for the time and expense of a trial, and judicial resources can be deployed.” 即係法庭傾向即使被告喺審訊首天先至認罪，仍然給予三分之一嘅認罪扣減，因為省卻咗嘅時間同埋法庭嘅資源可以再被調配，充分運用，但係實際而言，臨時嘅調配根本難以實行，以致資源不但不得充分運用，反而係浪費。