香港特別行政區 訴 黃宇森
|
HCCC 170/2015 香港特別行政區 高等法院 原訟法庭 刑事案件2015年第170號 ----------------
----------------
---------------------- 判刑 ---------------------- 官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。 案情指，被告喺機場嘅登機閘口等待登機嘅時候被關員截查，發現佢兩大腿裹上繃帶，內有共四包危險藥物。有關毒品經過化驗之後，證實為899克甲基苯丙胺鹽酸鹽嘅947克嘅晶狀固體，市值係440,355元。被告喺警誡下指佢係因為欠下賭債，其中一名客人指示佢報名參加旅行團，代佢運送毒品，而涉案嘅「冰」毒係佢出發當天嘅下午另一名男子替佢包裹在大腿上嘅，佢會喺到達新西蘭之後將有關嘅毒品交予他人，佢只係收取咗3,000鈫嘅車馬費，佢預計喺完事之後會得到報酬。 被告現年係19歲，有兩項嘅刑事紀錄，喺2013年因為管有危險藥物被判感化12個月，期後喺2015年3月11日因為一項干犯喺本案之前嘅盜竊罪被撤銷感化令，判到更生中心，本案係喺盜竊案擔保期間干犯嘅。 大律師喺求情嘅時候表示，被告喺中三輟學之後做過冷氣學徒、運輸工人，最後喺髮型屋工作，有穩定嘅收入，雖然確曾欠下債務，但係以佢工作平均每月兩萬鈫嘅收入，攤還並非難事，而今次導致佢鋌而走險嘅主要因素係因為佢母親患上癌症，急需籌得醫藥費，先至令佢毅然接受他人嘅招攬，步上替人販運毒品嘅不歸路。大律師強調，本案含孝道成份，而被告犯案嘅時候不足18歲，希望本席能夠予以較輕嘅刑期，從輕發落。 本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪以及大律師嘅求情，亦都閱讀咗被告所撰寫嘅求情信。根據譚伊真一案，就販運多於600克「冰」毒嘅量刑指引係沿用Abdallah一案就販運海洛英鹽酸鹽嘅指引，即係600至到1,200克起刑點係20至到23年。 就住本案嘅899克嘅「冰」毒，本席以二十一年半作為量刑基準。就住被告人嘅個人因素，雖然本席已經予以考慮，但係案例亦多次強調，喺呢一類（特別係販運危險藥物）嘅案件中，個人、家庭經濟因素並不足以構成額外扣減。本案牽涉國際性嘅因素，根據鍾炳焜案，本席將量刑基準往上提升一年半，再給予三分之一嘅認罪扣減，判刑十五年四個月。 |