香港特別行政區 訴 黃家杰

HCCC 177/2015

香港特別行政區

高等法院

原訟法庭

刑事案件2015年第177號

----------------

----------------

----------------------
判刑
以下內容乃法庭數碼錄音謄本
----------------------

官：　

被告人承認兩項販運危險藥物罪，本席喺判處嘅時候考慮咗整體情況，包括案件嘅性質同埋情節，尤其是所涉危險藥物嘅種類同埋份量、被告人嘅個人背景同埋辯方大律師嘅求情陳詞。本案嘅案情可以簡述如下：

喺案發當晚大概7時25分，海關人員喺被告人嘅住所附近嘅街上將被告人截停，喺被告人攜帶嘅黑色膠袋裡面搜獲共五十二個內含氯胺酮嘅膠袋。被告人係被拘捕，喺警誡之下，佢話被搜獲嘅係「K仔」，佢自己嘅，佢交畀人，佢亦都話「我唔識嗰個人，我等佢電話」，被告人又指出喺佢住所裡面仲有其他「K仔」存放。海關人員將被告人帶返佢住所，喺一張雙層床上層嘅櫃裡面撿獲下述物品：三個內含氯胺酮嘅膠袋、兩支匙羹、三沓密實膠袋、一把剪刀同埋一個電子磅。喺被警誡之下，被告人話搜獲嘅係「K仔」，佢仲話「我自己喺度磅完，然後入袋，再交畀人」。

被告人現年19歲，中二程度，同祖父、父親同埋弟弟同住，佢係無業嘅，亦都初犯。辯方蕭大律師指出，被告人父母離異，令到被告人缺乏管教，加上佢學業不濟，未完成中三就輟學，曾經喺一間餐廳嘅廚房工作，但係半年之後就失業，喺咁嘅情況之下誤交損友，被利用而犯案。蕭大律師亦都強調，被告人只係得19歲，尚算年青，之前從來都未干犯任何罪行，今次被捕之後，被告人即時向海關人員坦白招認，現在被告人亦都已經作反省，深感悔意，因此承認控罪，並且立志重新學習，希望可以重投社會，改過自新。被告人親自撰寫咗信件，裡面亦都表達咗佢嘅懊悔同埋志願。

喺本案，被告人販運嘅係氯胺酮，根據律政司司長訴許守城（[2009] 1 HKLRD 1）一案，販運危險藥物嘅人如果毒品純含量係50至300克嘅話，應該考慮判處6至9年嘅監禁。考慮咗整體情況，本席認為冇理由偏離量刑指引，因此兩項控罪都分別採用7年作為量刑基準。被告人應被視作管有全部呢啲氯胺酮嚟處理，呢啲氯胺酮嘅總純含量為294.08克，因此總量刑基準本席認為應該係八年半。被告人承認控罪，應該得到三分一嘅刑期扣減，考慮咗整體情況，顧及辯方大律師嘅陳詞，雖然被告人只係得19歲，而且係初犯，但係喺案發時候已經成年，顧及案例之後，本席認為三分一就係被告人應得嘅刑期扣減幅度。

被告人，請起立，根據上述理由，本席判你就每項控罪分別監禁四年八個月，並且命令第二控罪嘅刑期其中一年同第一控罪嘅刑期係分期執行，換句話講，你就兩項控罪，總共監禁五年八個月。