香港特別行政區 訴 陳家熙

HCCC 451/2016

香港特別行政區

高等法院

原訟法庭

刑事案件2016年第451號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人被控一項販運毒品罪，涉及嘅毒品係13.60克嘅「冰」毒。被告係承認咗控罪，亦都同意控方嘅案情撮要。

其實呢件案係比較簡單嘅。情況係喺案發當天，警員喺大埔寶雅苑附近係截停咗被告，跟住仲喺佢手上攞住嘅煙盒裡面，搵到控罪所列出嘅毒品。

在警誡下，被告話相關嘅毒品係自己吸食。

在後來嘅錄影會面中，被告亦曾經講過話，佢本來只係想買3.50克，但係對方畀多咗佢，佢發現之後，就想搵番嗰個人，交還番多出嘅份量。被告話，賣毒品畀佢嘅人身分不詳。而呢個人竟然收3.50克嘅錢，就畀咗大約十四克份量畀佢。當時佢正在失業，對方又係身分不詳嘅人，被告竟然會冒險帶住啲毒品出街，話還番畀對方。客觀嚟講，呢個講法可以話係匪夷所思嘅。本席認為，明顯嘅情況係，被告用販運毒品嘅方式去支持自己嘅毒癮。

被告今年相對年輕，只有20歲。代表大律師指出，被告係在事發一年之前，因為失戀，被朋友誤導話吸毒可以解壓，所以先至係開始吸毒嘅。喺呢一方面，本席都覺得好奇怪，政府及各相關機構近年都係大力宣傳毒品害人嘅呢個訊息，但係被告都係聽唔入耳、唔理，但係朋友一講，被告就願意去試。咁嘅情況，被告只可以怪自己思想同定力都有問題，家人唔可以去批評其他人帶壞被告，被告人去販運毒品其實亦都害咗唔少人。雖然被告冇上證人台，但係整體嚟講，本席會接納被告係有吸食毒品嘅習慣，而本案中嘅一少部分毒品係會留番佢自己食用。

本席決定會以10克「冰」毒作為販運嘅刑期準則。考慮到案例譚伊真（呢個係譯音）嘅指引（[2014] 3 HKLRD 691），本席係會以7年作為刑期嘅起點，在扣減三分一之後，刑期變成四年八個月。

當然，其實本席要進一步考慮嘅係，毒品就算係管有都屬違法，都應該受到懲罰。不過，喺本案之中，另一方面要考慮嘅事情係，被告都相對年輕，以往亦都冇犯過事。最後，本席決定係酌情將刑期下調兩個月，呢個已經係比較寬鬆嘅處理嚟。被告應該好好利用喺懲教署裡面嘅時間，為將來正當謀生去打好基礎，不過做唔做係被告人自己嘅決定。

刑期係四年半，即係四年六個月。