香港特別行政區 訴 陳宏林

HCCC 56/2017

[2018] HKCFI 2448

香港特別行政區

高等法院

原訟法庭

刑事案件2017年第56號

----------------

----------------

------------------------------------

判刑
以下內容乃法庭數碼錄音謄本

------------------------------------

官：　

被告人陳宏林喺呢一件案件開審之前，承認一項販運危險藥物嘅控罪。

案情撮要顯示，喺2016年嘅8月18日大約下午嘅7時30分，被告人所乘坐嘅一架貨車係駛到長沙灣通州街一條天橋之下嘅一個草叢旁邊就停低咗，咁被告人就從呢個乘客位係落車，而本案嘅另一個被告人莫志文就係從司機位嗰度落車。當時莫志文落車嘅時候，手持一個黑色嘅膠袋，其後佢將呢個膠袋放咗喺草叢上面。佢放低咗呢個膠袋之後，莫志文就開車離開，而被告人就橫過通州街，去到通州街對面嘅行人路，咁一直喺度看守住呢一個係黑色嘅膠袋。咁喺稍後嘅時間，被告人就係離開，咁跟住喺離開不久之後，佢就被警員係拘捕。

咁而呢一個黑色嘅膠袋，後來係被警員發現藏有係三包共重2,904克嘅「冰」毒。喺警誡之下，被告人係表示啲「冰」毒唔係佢嘅，而係莫志文叫佢看管住嘅。咁而喺錄影會面裡面，被告人就進一步表示佢喺車上高，曾經協助過係莫志文係將三包嘅「冰」毒係放入去呢個黑色嘅膠袋裡面，佢當時候亦都知道嗰啲係「冰」毒。

被告人現年36歲，有八次嘅刑事紀錄，其中兩次係涉及毒品，不過就並沒有任何販運危險藥物嘅刑事紀錄。

咁而被告人喺呢件案件嘅開審之前嘅一日，1月嘅時候就通知法庭，佢將會係承認佢嘅控罪。咁除咗佢承認控罪之外，就住本案而言，被告人亦都係兩次係出庭作證，咁雖然第一次係需要解散呢個陪審團，不過當時就並唔係佢嘅證供係有問題，而係因為一啲係法律技術上嘅問題。不過無論點都好，被告人喺重新審訊嘅時候，亦都係再一次出庭指證呢一件案件嘅另一個被告人，即係莫志文，咁我亦都相信佢嘅證供好大程度上係令到莫志文係被陪審團裁定罪名成立。咁所以佢嘅證供係有用，咁我亦都相信佢好大程度上如實咁樣樣交代當日事發嘅經過。

咁首先就係根據上訴庭所訂下嘅量刑指引，販運2.9公斤嘅「冰」毒，量刑嘅起點就係24至到25年，咁考慮到我喺處理莫志文嘅判刑嘅時候，係以24年作為呢個量刑嘅起點，咁為咗係公平，今次亦都係用24年係作為量刑起點。

咁被告人喺開審之前一日先至表示係認罪，咁根據香港特別行政區訴吳文南（譯音），譯音嚟嘅啫，Ngo Van Nam（CACC 418/2014），被告人可以享有嘅折扣就係20個per cent。除此之外，正如我剛才所講，被告人係曾經兩次出庭作證，雖然佢兩次出庭並不是係兩個完全獨立嘅審訊，不過佢亦都係有出過庭兩次。咁正如係我啱啱所講到，佢嘅協助、佢嘅出庭作供係好大程度上令到莫志文被定罪。

咁過往嘅案例就顯示，如果係同案嘅被告人認罪同埋係提供證供嘅話，咁一般係可以獲得50個per cent，咁呢50個per cent嘅折扣就係33個per cent承認控罪，咁另外再加其餘我相信係17個per cent喇。咁喺呢一件案件裡面，當然被告人就並冇係第一時間認罪嘅，咁因此佢正如我上面所講，就只係可以係獲得20個per cent嘅折扣，不過因為佢係曾經兩次係出庭作證，咁所以我今次亦都係決定畀20個per cent嘅額外折扣佢。咁換句話嚟講，今次佢係可以享有係40個per cent嘅折扣，除咗呢40個per cent嘅折扣之外，我睇唔到仲有其他可以進一步減刑嘅空間。

咁因此就住量刑方面，我係以24年，即係288個月作為呢一件案嘅量刑起點。被告人承認控罪，同時亦都係曾經兩次出庭作證，因此佢可以獲得係40個per cent嘅量刑折扣。喺咁樣嘅情況之下，呢288個月嘅即時監禁就係下調至到172個月。咁換句話嚟講，就住被告人所承認嘅一項販運危險藥物嘅控罪，佢係被判處十四年四個月嘅即時監禁。