香港特別行政區 訴 高衛健

HCCC 61/2018

[2019] HKCFI 128

香港特別行政區

高等法院

原訟法庭

刑事案件2018年第61號

----------------

----------------

------------------------------------------

判刑

以下內容乃法庭數碼錄音謄本

------------------------------------------

官：　

被告現年34歲喇，之前喺2013年曾經有過一項管有兒童色情刊物嘅案底，曾經被判監係6個星期嘅。今次首先佢係承認咗一項欺詐罪，而該欺詐罪嘅事主就係曾經接載佢嘅Uber車司機，本案嘅第三控方證人，佢係連Uber車司機都欺詐咗500鈫。另外佢喺審訊之後被裁定三項欺詐罪、五項嘅勒索罪、兩項盜竊罪、一項搶劫罪、一項非禮罪同埋一項強姦罪罪名成立。

本案嘅受害人X係一名找換店嘅妙齡女職員，被告利用假名佯稱自己揸美國護照，係公司嘅高層，但係唔見咗個護照，所以要滯留香港作為藉口，欺騙X幫佢用自己嘅身分證租咗一間五星級嘅酒店房。當時被告係用現金支付房租，令到X相信佢所講話自己有高薪厚職嘅講法，繼而以需要生活費為由，要求X借出兩萬鈫現金畀佢。得逞之後更加繼續講大話，令到X陪佢畀錢買咗個六千幾鈫嘅手提電話。跟住就一個大話冚一個大話，又話驚住啲錢會再唔見，要求X開一個馬會投注戶口畀佢將啲錢放入去。之後更加話要求美國公司嘅會計匯錢過嚟還款，但係不得要領，所以要X再存多兩萬鈫入去個馬會投注戶口，X不虞有詐照做。咁跟住被告又叫X上去酒店房，呃佢影祼照，而呢啲影祼照期間更加非禮同埋強姦佢。被告得到呢啲好處之後仍然冇打算收手，跟住不斷以佢手中有X祼照呢個把柄嚟要脅X，作出各種不當嘅要求，包括要求X幫佢租住服務式嘅住宅單位，幫佢去滙豐，幫佢去邦民貸款70,000鈫同埋148,000鈫。要脅要佢陪佢去睇樓，租樓，支付按金、租金，一步步令X跌入萬劫不復嘅深淵。佢又要求X連結起銀行戶口同埋個馬會戶口，好讓佢可以調動啲錢。事實上根據X嘅馬會投注戶口紀錄，被告係多次喺X不知情之下用過個戶口嚟賭博，而所涉及嘅金額並非係細金額嚟嘅。X因為有祼照喺被告手，或者相信有祼照喺被告手，感到極度羞恥、惶恐，同時亦都抱有一啲不切實際嘅希望，希望最終被告可以還錢，亦都希望事件盡快告一段落。而被告屢次恐嚇佢，唔准佢張揚此事，否則還款嘅協議就告吹，令到X唔敢同屋企人講。被告人係睇中X單純嘅弱點，騙財騙色，用層出不窮嘅藉口不斷向X詐取金錢，手段係極度卑劣。

X喺本案中一共損失大概係二十二萬多。被告不但騙取咗X嘅金錢，而呢啲金錢係佢差唔多所有嘅積蓄，更加令到X要償還債項。X作供嘅時候清楚講出呢兩年來精神上所受到嘅煎熬令到佢患上抑鬱憂慮症，而被告人對自己嘅所作所為完全冇承擔，本席完全察覺唔到佢有任何嘅悔意。當然被告係有權要求控方證實每一項針對佢嘅控罪，但係就令到X需要出庭作供，重溫不快嘅經歷，以及面對一啲令佢難堪同埋失實嘅指控。雖然呢一點並非加刑嘅因素，但係足以令被告喪失咗唔需要受害人出庭作供可以獲得認罪後嘅扣減。

綜合本案嘅案情，本席認為喺審訊後以下各項控罪嘅刑期係如下：控罪一，欺詐罪，3年。控罪二，欺詐罪，3年。控罪三，欺詐罪，3年。控罪四，猥褻侵犯罪，30個月。控罪五，強姦罪，6年。控罪六，勒索罪，3年。控罪七，盜竊罪，兩年。控罪八，勒索罪，3年。控罪九，盜竊罪，兩年。控罪十，搶劫罪，3年。控罪十一，勒索罪，3年。控罪十二，勒索罪，3年。控罪十三，勒索罪，3年。控罪十四，欺詐罪，兩年。

本席考慮到量刑整體性嘅原則，喺反映被告整體嘅刑責，本席下令以下部分嘅刑期係分期執行。控罪一中嘅4個月，控罪二嘅刑期入面嘅4個月。控罪三4個月。控罪四其中嘅3個月。控罪六其中嘅6個月。控罪七其中嘅3個月。控罪八其中嘅6個月。控罪九其中嘅3個月。控罪十、十一、十二、十三，每項控罪中嘅6個月，以及控罪十四中嘅3個月，同控罪五強姦罪嘅6年控罪分期執行，總刑期11年。