香港特別行政區 訴 李偉嘉

HCCC 268/2019

[2019] HKCFI 2721

香港特別行政區

高等法院

原訟法庭

刑事案件2019年第268號

----------------

----------------

----------------------

判刑

以下內容乃法庭數碼錄音謄本

----------------------

官：　

被告人李偉嘉，被控一項強姦罪。被告否認控罪。經審訊之後被陪審團裁定罪名成立。

睇番呢件案件個案情。案情就顯示，被告人係喺2016年6月11日係認識呢一個受害人X嘅，當時佢哋兩個一齊就去一個Game of Dice嗰個網上遊戲會員嘅聚會。嗰晚X飲得好醉，咁最後係被告人送咗佢返屋企，當時係同埋另外一個女人送佢返屋企嘅。

到咗6月12號嗰日，被告人就用WhatsApp，就係同X講，佢就係送X返屋企嗰個人，跟住被告人就去咗X嘅屋企，就玩遊戲。喺12號之後，被告人同埋X繼續係有用呢個WhatsApp嚟傾偈嘅，可以睇到被告人就WhatsApp講嗰啲說話，就似乎係想追X。而到最後，佢就喺呢個6月15號仲去接X放工，又去咗X屋企食飯。

到咗6月19號嗰日，被告人同X就去咗一個喺尖沙咀叫做J1 Club嘅地方一個聚會，嗰晚X就飲得好醉，佢醒番嘅時候就發覺自己係赤條條，就喺一個酒店嘅床上面，而被告人就瞓喺佢身邊。佢當時已經即刻叫醒被告，然後問佢，問被告頭先有冇搞佢，意思即係話問被告有冇同佢發生性行為，被告就話冇，而當時X係相信咗被告人嘅。

喺19號之後，呢個被告人同X都繼續有喺個WhatsApp度傾偈嘅。到6月25號，被告人同X又再出咗去，就又去咗呢個J1 Club，嗰次X又係飲得好醉，而被告人亦都係帶咗佢返屋企嘅，而X仲喺WhatsApp度同被告人道歉，話自己飲到咁醉。喺嗰日之後，雙方都冇再有任何嘅聯絡。

到咗7月5號，X就因為冇月經嚟，所以佢就自己做咗一個測試，就發現佢係嗰個測試係呈陽性，顯示佢係有孕。咁樣X就知道佢自己喺過往嗰兩個月，係冇同任何人發生過任何嘅性關係，唯一一次佢冇喺屋企瞓就係喺19號嗰晚，喺個酒店度佢醒咗嘅時候，佢所以就用呢個WhatsApp去問被告，就話究竟佢哋嗰晚兩個有冇搞到，意思就話嗰晚有冇發生性行為。被告人仍然否認，咁於是X一怒之下，就將所有嘅WhatsApp嘅訊息刪除晒。X係曾經講過畀兩個朋友聽關於呢件事嘅，一個就叫Miki，另一個叫做鄭健樂，咁而鄭健樂因為係做呢個社工嘅，外展社工，咁佢當時就教X就話，跟住同被告人嗰啲嘅WhatsApp嘅訊息就唔好再刪除。

喺7月6號，X又再用呢一個WhatsApp問多一次被告，究竟被告有冇搞佢，被告亦都係否認嘅。跟住X就呃被告，就話佢已經報咗警，佢咁樣做法就係希望被告人係會直接當面向佢承認，佢的確係有喺酒店度搞到佢，同埋係負責佢自己所做過嘅嘢。而X係要去到呢個7月11號先至報警嘅，佢當時報警係因為被告人就係話佢好恐嚇、勒索佢，就又話已經搵咗律師，咁X一怒之下就去報警嘅。而喺呢個7月11號之前，X根本係冇報到警嘅，佢解釋就話佢嗰個心情就係喺報警同唔報警之間，一方面佢想被告人係承擔番佢自己嘅責任，但係另一方面佢又唔想佢自己嘅媽媽，即係比較保守嘅媽媽，同埋其他親近佢嘅身邊嘅人，係知道呢件事情。X的確係有問到被告人攞錢嘅，佢攞嘅錢就愛嚟做墮胎同埋做呢一個嘅保養身體嘅情況，即調理身體。咁喺7月7號，就的確喺個公園度已經係從被告度係攞咗1,000鈫。

喺呢個報咗警之後，7月11號報警之後，X最後就係有做咗一個墮胎嘅手術，咁而嗰個即係墮咗出嚟嘅胎兒就進行咗呢個DNA嘅測試，就證明被告人係呢一個胎兒嘅爸爸。

雖然辯方嘅講法就係話，佢同X係有兩次喺X嘅屋企，喺冇用到避孕套，喺X同意之下，係發生過性行為，所以就唔係有呢一個嘅強姦過呢個X，但係基於陪審團係裁定呢個被告人呢個強姦罪嘅罪名成立，即係話陪審團係唔接受被告人呢個講法，而陪審團個裁定就顯示就係話，喺19號嗰日喺酒店度的確被告人同X係發生咗性行為，而當時X係醉到一個程度，佢係唔能夠畀到佢嘅同意，而被告人係明知X係根本唔能夠畀到同意，或者係罔顧X是否會同意而同佢進行性行為，因此係干犯咗強姦罪。

好，講被告嘅背景。被告而家33歲，未結婚，但係同一個女朋友係有一個細嘅女。佢係佢媽媽嘅獨子，因為爸爸就較早時候已經過咗身。喺犯案之前，被告係冇案底嘅。而且睇到啲資料，佢係一個非常之良好品格嘅人。

根據畀呢個品格證供嘅證人黃女士講，被告人做嘢非常之勤奮，因為呢個黃小姐識被告嘅時候，被告係做呢一個嘅助教，喺間學校度，佢當時就曾經係同事，一個短時間嘅同事。黃小姐或者黃女士覺得，即係被告人畀黃小姐或者黃女士嗰個嘅印象就係又戇直、又正直，同埋係非常之孝順，就好勤力嘅。咁而被告人後屘就係加入咗警隊，就做咗呢個警員。而佢喺警員訓練學校嘅時候，就已經係考第一，就攞到呢個叫做銀笛獎。而佢喺做警察，由2013年至2016年嗰三年幾四年嘅時間，就攞咗好多嘅獎狀，就喺呈堂有成四十七張咁多，就冚𠾴唥都係話佢即係破案呀、做嘢嗰個各方面係點樣好法。

喺求情嘅時候，林大律師就話，被告人干犯呢個控罪就唔係一早有預先安排嘅，而且亦都係冇對呢一個受害人X係用過暴力。

林律師就個陳詞就話，一般嚟講，喺呢一類嘅案件，好多時都係會用5年做呢一個嘅量刑起點。佢亦都接納，喺呢件案件係有一個加刑嘅因素，就因為被告人係冇用到呢個避孕套，令到X係懷孕。而另外求情就講，因為被告人嗰個女係好年幼，佢一路都已經係被監禁，所以佢就冇時間可以係陪到嗰個女，同埋佢因為呢件事件，即係前途盡毀。林律師就希望本席係考慮埋呢個被告人嘅家庭背景，同埋佢一個呢個良好嘅品格，就盡量係採納一個較輕嘅量刑起點。

強姦係非常之嚴重嘅罪行。一名嘅人士，如果係因為干犯咗強姦罪，喺公訴罪行之下被判罪名成立，係可以被判終身監禁。喺呢件案件，其實大家都可以睇到，雖然事發已經好多年，2016年嘅事，但係當X上嚟畀口供，講番三年幾前嘅事，佢都冇辦法係去忘記呢件事件對佢做出嘅傷害。雖然喺呢件嘅案件，被告人去強姦呢一個嘅受害人X，X當時就唔係話明知道被告人強姦緊佢，當時完全知道係咩嘢事，而係一件案件就係話，個受害人根本唔知道有人同佢發生過性關係，因為當時佢係醉到呢個程度，係唔能夠畀佢嗰個同意。但係喺我嚟睇，我就唔覺得話，你都唔知道畀人強姦嗰個情況係相比話，你明知畀人強姦嗰種係冇尊嚴嗰種嘅傷害係為輕，某程度上都唔知發生咗咩嘢事，都唔知點解會自己有咗BB，究竟喺酒店發生過咩嘢事，可能會對嗰個受害人嚟講仲慘，因為佢唔能夠去想像究竟發生咗係咩嘢事。

好明顯，喺呢件事件，被告人當時就係利用X醉到嗰個咁嘅程度，而係同佢進行呢一個性關係，佢明知道X係冇辦法可以有呢個行為能力嚟顯示佢是否同意性交，或者係畀佢嘅同意，或者係去抗拒。而令到呢件案件更加嚴重嘅，當然呢個係一個加刑因素，就係好明顯被告人點解唔用避孕套呢？梗係為一己之慾，因為唔使用避孕套，會得個快感會好啲。喺咁嘅情況之下，佢就根本就唔理個受害人，就去唔用避孕套同人哋性交，令到X就有呢一個受孕嘅危險、危機存在，而事實上佢係真係有咗BB喎。到最後，當然喺咁嘅情況之下，佢係被強姦而有咗BB，佢去選擇墮胎，亦都係大家會明白佢呢個選擇。

所以喺考慮晒呢啲全部嗰個案情之後，包括埋當然就係被告人冇用到個避孕套，同埋令到X係受咗孕，到最後係需要墮胎，我就認為一個恰當嘅量刑起點係6年。被告唔認罪，當然冇任何呢一個即係認罪減刑嘅折扣。雖然林律師要求本席就話，「妳睇下佢家庭背景吖，佢係獨子，佢又要照顧媽媽，佢又即係前途盡毀」，但係我唔認為呢一啲係減刑嘅理由，被告人自己犯咗法，就要承擔番呢個事件嗰個需要嘅責任。雖則咁，但係我都認為被告人未犯罪之前嗰個良好嘅品格係可以畀我可以，就將嗰個刑期係稍為減輕，我減嘅就係減兩個月。

即係話，被告人就呢個強姦嘅罪行要坐五年十個月嘅監。