香港特別行政區 訴 吳嘉兒

ESS33914-6/2019

[2020] HKMagC 10

香港特別行政區

東區裁判法院

傳票2019年第33914號

吳嘉兒被控在立法會會議廳範圍內逗留時未有遵守秩序

傳票2019年第33915號

鄭家朗被控在立法會會議廳範圍內逗留時未有遵守秩序

傳票2019年第33916號

何秀儀被控在立法會會議廳範圍內逗留時未有遵守秩序

判刑理由

以下內容乃法庭數碼錄音謄本

官：係，咁三位，考慮到有關今次嘅嗰個行為嘅性質，確實正如你哋代表大律師所講喇，並非一個好嚴重嘅情況嚟嘅，尤其係相較一啲過往可能需要判監嘅案例嚟講，絕對係--個程度上有好大嘅分別。咁亦都好好彩，今次即係嗰個--成個嗰個干擾就唔係太過嚴重，為時亦都唔係好長，咁係整個案件我覺得特別要考慮嘅，就正如黃大律師所講，我明白三位都唔係話為咗你哋自己個人嘅目的，唔係為咗一啲私利去到做今次嘅行為，咁但係即係我希望經過今次嘅事件，三位都要明白，即係雖然你哋係好想即係有關嘅當局，有關嘅官員可能去聽多啲你哋嘅意見，你哋真係想去表達你哋嘅意見，為咗成個社會嘅利益，但係始終如果係做過咗界，做咗一啲犯法嘅行為，就要面對嗰個刑罰嘅。今次雖然即係嗰個刑罰可能我可以話畀你哋聽，係相對可能較輕，但係有時，即係如果因此做咗一啲可能係比較嚴重嘅事情，尤其係可能係一啲須要面對好長監禁嘅一啲嘅事情，到時即係你自己要衡量一下嘞，當然你話我為咗抗爭，可能我覺得係冇問題，但係變咗你如果真係要去坐監，尤其係一啲好長嘅監禁嘅話，喺嗰段時間你又可以為咗個社會做到啲乜嘢呢？有時可能留番個--即係你自己有用之軀，尤其你哋三個都係大學生，將來都一定係社會嘅棟樑嚟嘅，其實就係靠你哋嘅。咁我覺得即係如果隨便咁樣去到即係就被還押，甚至乎被判監嘅話，反而即係就失去咗你哋本身可以做到好多嘅嘢，好多嘅作用，為社會作出嘅貢獻。咁所以呢點我係希望即係喺今次嘅案件之後，你哋三位本身都係冇刑事紀錄嘅，今次可以考慮一下我頭先所講嘅嘢。

咁正如我頭先所講喇，我覺得今次嗰個案情相對比較輕微，有關嘅即係你哋嘅目的，亦都係並非係為咗自己嘅，咁呢啲全部都係--即係我覺得令到今次唔需要判處一個即時監禁嘅一啲嘅因素嚟嘅。咁我認為一個簡單嘅罰款已經可以係--即係足以就係作為嗰個懲罰㗎嘞。咁但係始終考慮到雖然頭先所講就係嗰個為時短呢啲，咁但係我覺得呢個都當然喺判裁決嘅時候都講過，呢啲都係因為保安其實制止咗你哋㗎喇，其中一個因素，同埋亦都睇到你哋三人其實都係講緊本身都有個計劃，去到做今次嘅事，所以我考慮過有關情況之後，三人都係罰款1,000元嘅。咁幾時可以交到呀，Miss Wong？

MS WONG：我攞取少少指示。

官：好。

MS WONG：今天之內。

官：全部都今天可以，係咪？

MS WONG：係，今天之內。

官：第三被告佢就應該有個擔保金嘅。

MS WONG：係呀...

官：應該就...

MS WONG：可以扣除吖。

官：都可以--佢係本身係幾多呀？個--唔好意思吓，即係我都...

MS WONG：$500，喀，本身係500鈫。

官：好呀。咁總之全部都今天--即係繳交喇。

MS WONG：可以繳交。

官：餘款亦都係今天繳交喇，好唔好呀？好，有冇其他事情添？

MR WONG：冇其他事情，唔該閣下。

官：好，唔該晒。好，暫時休庭一陣。