香港特別行政區 訴 何思維

HCCC92/2009

香港特別行政區

高等法院

原訟法庭

刑事案件2009年第92號

----------------

香港特別行政區

訴

何思維

----------------

--------------------------

判刑

以下內容乃法庭數碼錄音謄本

----------------------

官：　　　　被告承認一項製造危險藥物罪，違反香港法例第134章《危險藥物條例》第6（1）（a）及（2）條。

案情指，警員截查被告個房間嘅時候，撿獲一共39.56克可卡因、238.71克可卡因鹽酸鹽，以及256.49克碳酸氫鈉。另外，亦都搜獲如電磁爐、金屬碟同埋筷子、量杯、烤焗杯、電子磅，其他可以製作毒品嘅工具。被告承認佢為咗金錢嘅報酬，喺房間煮可卡因。而根據專家嘅證供，以上嘅工具可供提煉可卡因鹼。而有關嘅可卡因，市值係407,368元。

被告現年34歲，共有七次共十項嘅刑事紀錄，之前並冇涉及毒品嘅紀錄，最後一次係喺2006年2月，因為處理與公訴罪行有關財產罪被判監6個月，喺2006年6月獲釋。

大律師喺求情嘅時候指，被告自1996年開始染上毒癮，而2008年5月之後失業，之後受咗人唆擺，先會干犯今次嚴重嘅罪行，對此佢已經深感內疚，第一時間認罪，彰顯佢嘅悔意。另外，大律師亦都表示，有關嘅製毒工場屬一人操作，不屬大規模，被告角色低微，之前並冇同毒品有關嘅紀錄，所牽涉嘅工序簡單，亦都冇窒礙警方進入搜查，希望本席能夠予以一個較低嘅起刑點。

本席喺量刑嘅時候，考慮咗本案嘅案情、毒品嘅種類、重量、有關嘅指引、被告認罪，以及大律師嘅求情，亦都閱讀咗被告所撰寫嘅求情信。製造毒品嘅罪行比販運毒品更為嚴重。本案牽涉嘅可卡因總重量係278.27克，根據販運可卡因嘅量刑指引，販運可卡因200至到400克，起刑點係12至15年。

本席考慮咗大律師所指，本案所涉製造危險藥物嘅工場同埋涉及嘅毒品重量係不及吳永漢案CACC 140/2000，該案涉及嘅係700克嘅海洛英鹽酸鹽，上訴庭認為，一個20年嘅起刑點係正確嘅。

然而，根據葉粵豪案CACC 455/2007，該案與本案同涉簡單嘅裂解可卡因工序，該案嘅被告亦係一人行事，就著案中主要嘅毒品（50.70克嘅可卡因），上訴法庭認為13年嘅起刑點係合適嘅。案例指出，法庭喺量刑嘅時候，需要考慮規模大小、所涉毒品重量及工具以致可製成毒品量。

本席認為，雖然本案所搜出嘅製毒工具顯示，被告所涉嘅製造危險藥物不屬最大規模，然而規模定必比葉粵豪案為高。本席以16年作為起刑點，予以三分之一嘅認罪扣減，判刑十年八個月。