香港特別行政區 訴 鍾世華

HCCC159 & 160/2009

香港特別行政區

高等法院

原訟法庭

刑事案件2009年第159號

----------------

----------------

刑事案件2009年第160號

----------------

----------------

----------------------------------------

判刑
以下內容乃法庭數碼錄音謄本

----------------------------------------

官： 兩名被告原本共同被控同一項嘅販運危險藥物罪，違反香港法例第134章《危險藥物條例》第4（1）（a）及（3）條。

第二被告喺初偵時認罪，故轉介高院後，被分為兩編號不同嘅案件。現在第一被告亦在本席席前承認控罪，故此本席喺判刑嘅時候，將兩人一併處理。

案情指，兩名被告被警員截查，從佢哋嘅身上分別搜出17,445元與及2,370元。及後兩人被帶到佢哋居住嘅單位搜查，發現合共39包毒品以及1,500個可再封膠袋、三個電子磅以及兩部手提電話。兩人及後承認由另一人聘用，分銷毒品，以賺取報酬。毒品經過化驗之後，證實為1,022.27克粉末，內含835.32克氯胺酮，而毒品總數當時嘅零售價為港幣128,806元。

第一被告現年22歲，過往有六次刑事紀錄，全部與毒品有關，最後一次喺2006年6月16日，因為盜竊罪被判教導所，喺2007年9月28日獲釋。大律師喺求情嘅時候表示，被告坦白認罪，而今次犯事係因為誤交損友，被教唆而干犯本案，但係家人對佢仍然支持，以及不離不棄，希望法庭予以輕判。

第二被告現年21歲，過往並冇刑事紀錄。而大律師喺求情嘅時候表示，第二被告來自單親家庭，中四輟學。大律師指，第二被告被捕之後，即時已經將事件和盤托出，亦都第一時間認罪，希望法庭能夠予以輕判。

本席喺量刑嘅時候，考慮咗本案嘅案情、毒品嘅種類、重量以及量刑指引、被告承認控罪與及大律師嘅求情。本案發生喺許守城案新量刑指引頒發日期之後，根據許守城案，販運600至到1,000克嘅氯胺酮，起刑點係12至到14年。就本案嘅835.32克氯胺酮，本席採納13年為量刑起點。予以三分之一嘅量刑扣減，各被告判刑104個月，即係八年八個月。