香港特別行政區 訴 歐陽捷

HCCC132/2012

香港特別行政區

高等法院

原訟法庭

刑事案件2012年第132號

----------------

----------------------

判刑
以下內容乃法庭數碼錄音謄本

----------------------

官：　

被告承認一項販運危險藥物罪，違反香港法例第134章《危險藥物條例》第4（1）（a）及（3）條。

案情指，喺案發當日，兩名警員去到一楝大廈垂直巡邏至4樓一別墅外，見到被告手持一密實袋，期間不時左右張望、神色慌張。當警員上前向佢出示委任證，表露身分嘅時候，被告將膠袋掉喺地上。警員截停被告，執起膠袋，發現喺個密實袋內有一個透明袋，內有六包毒品。被告喺被拘捕之後話包毒品唔係佢嘅，佢冇嘢講。

毒品經過化驗之後證實為內含27.16克甲基苯丙胺鹽酸鹽嘅27.35克晶狀固體。當時嘅市值為20,922元。被告曾經有兩次販運危險藥物嘅案底，一次係1990年被判監3年，最後一次喺2006年4月18號被判監五年零四個月，喺2009年3月19日刑滿出獄。

根據大律師嘅求情，被告現年58歲，因為患有肩膊痛，以及其他嘅病患，唔能夠有固定嘅工作。而年邁嘅母親患上癌症，一時愚昧，為咗賺取500元，先至干犯本案。大律師指被告嘅母親喺被告囚禁嘅時候，仍然不離不棄，常常去探望佢，佢對於自己今次犯錯導致到要服刑，不能照顧母親、女友及女兒而深感後悔，大律師要求本席盡量予以輕判。

本席喺判刑嘅時候考慮咗本案嘅案情、有關嘅量刑指引、大律師嘅求情、被告所撰寫嘅求情信內容同埋被告承認控罪。本案涉及27.16克嘅「冰」毒，根據量刑指引，販運10至到70克嘅「冰」毒，起刑點係7至10年。本席以七年半作為本案嘅起刑點，給予被告三分一認罪扣減，判刑5年。