香港特別行政區 訴 馬智豪

HCCC283/2009

香港特別行政區

高等法院

原訟法庭

刑事案件2009年第283號

----------------

----------------

--------------------------------------------

判刑
以下內容乃法庭數碼錄音謄本

--------------------------------------------

官： 喺呢單案開審第一日，代表你嘅葉大律師就向法庭顯示話你將會對呢個部分控罪認罪。經過呢個你哋控辯雙方商討之後，你就對呢個控罪第三、第四、第七、第十、十三、十四、十七、十九條認罪，亦都接納咗有關嘅案情，咁樣做法就避免呢個受害人上嚟法庭，再講番呢個相當不愉快嘅經歷，呢樣嘢嚟講係你最有力嘅求情理由之一。

咁樣案情顯示，呢三名受害人（L君、W君、C君）年齡分別係14、17、16歲。

控罪三有一個令人相當困擾嘅地方，就係當呢個第三證人唔願意跟你去傷殘人士廁所嗰時，你就恐嚇會打佢；控罪四就係顯示第一證人同你睇緊呢個淫褻電影嗰陣時就互相手淫；控罪七就係肛交，但係當呢個第一證人感覺到佢痛楚嗰陣時，你就停止有關嘅行為，咁呢樣嘢嚟講，都顯示出你唔係一個完全唔顧及他人嘅年青人。其他控罪嘅詳情，我就唔願意講太多，凈係讀啲有關嘅出嚟就算喇。

第十條控罪就係話呢個喺有關日期，被告人同第一證人就係喺呢個傷殘人士廁所，要求第一證人同你口交，跟住就係要求呢個第一證人同佢肛交，咁同第七項控罪一樣，當呢個第一證人感到痛楚你就停止，不過你其後都要第一證人繼續進行口交，同你進行口交；第十三項嘅控罪就係都係牽涉第一證人，咁同樣亦都喺進行肛交嗰時，第一證人係感到痛楚，你就冇繼續；第十四項控罪就有少少呢個控罪同其他有啲唔同，亦都係同第三條一樣，就係有啲恐嚇成份，不過恐嚇成份就並唔嚴重，你就同第二證人講如果佢有事，你就唔幫第二證人；第十七項控罪就係牽涉第一證人，咁就係喺呢個傷殘人士廁所裡面口交；第十九條控罪就係喺你個屋企嗰度同第一證人發生一啲所謂淫褻污穢嘅行為，就睇緊電視嗰陣時，你就叫第一證人同你口交。

大概嘅案情就係咁樣喇。正如我頭先所講，我唔想呢個時候，因為牽涉嘅受害人年紀唔係大、未成年，我唔想講太多嘅有關案情。不過留意到，就係呢個案情除咗第三條同埋第十四條之外，嗰啲受害人都係同意嘅，即係呢個做法，大家雙方同意嘅。但係同意得嚟，我亦都要留意下佢哋嘅年紀。

喺判刑嘅時候，我就需要考慮究竟你嘅行為對呢班受害人有冇造成重大嘅創傷，所以喺上次我就係要求見嘅有幾個報告，就係睇下呢個心理創傷報告對於關於呢個受害人有咩嘢描述。心理醫生就話，當佢睇過呢三位受害人，我可以講就係不幸中之大幸。第一位佢覺得就係冇乜嘢呢個創傷嘅，冇乜呢個負面嘅影響，心理輔導亦都唔需要，因為佢已經得到屋企嗰個父母嘅支持。我要提出指出就係，呢位受害人只不過係14歲嘅啫；另外一位17歲嘅受害人，心理醫生就話佢有呢個自我摧殘嘅行為，同埋佢話佢對於自己個行為係好羞恥，不過醫生係強調，就話呢件事只不過係加速佢嗰個自我傷殘行為，因為佢不嬲都有呢個問題，亦都醫生覺得心理輔導係需要嘅，對呢位證人嚟講；第三位就16歲，並沒有顯示顯著嘅心理衝擊，咁佢話呢個16歲嘅青年人亦都係拒絕接受心理輔導，因為佢相信佢自己係可以對呢個朋輩壓力面對，因為佢有勇氣同埋有決心。咁我再講番頭先嗰句喇，不幸中之大幸。

喺求情嚟講，頭先一開始我個判刑理由已經講，你最大嘅求情理由就係你認罪。如果係我判你一個規定嘅刑期，即係譬如話3年、5年嗰啲，我一定要畀一個三分之一嘅折扣你嘅。

咁樣睇下呢個，呢單案裡面嚟講，嗰個心理醫生報告、感化官報告對你個評語其實係唔差嘅。你今年係17歲，根據報告透露，你同異性維持關係有困難，你對自己嘅性取向亦都含糊，犯罪嗰個原因係對性嘅好奇。根據心理醫生嘅報告，佢就話你重犯嘅機會係低至到中等。咁就話你呢個還押期間行為良好，感化官報告亦都話你對呢個父母孝順，一個孝順仔，還押期間就時常同父母通訊，真誠反省。

喺量刑嘅時候，我考慮到你個年齡同埋呢個受害人（三個受害人）嘅年齡相差不大，亦都除咗嗰啲輕微恐嚇元素之外，不涉及暴力，受害人嘅心理評估亦都冇呢個永久嘅心理傷害。同埋今朝早葉大狀求情期間係呈遞過你封求情信，我亦都喺休庭嗰陣時睇過你媽媽同埋你哥哥嘅信，咁呢啲信我都要同你講，佢哋係寫得好真誠。我亦都睇得出喺呢啲信裡面，你做呢件事不但只對你嘅前途會有影響，對你家庭打擊都好大。

因為你呢個認罪，就令到啲受害人唔使上嚟法庭畀口供。我都想補充一點，喺三個受害人嗰個評估報告裡面，有一個受害人係同嗰個心理醫生講，佢自己關於上嚟法庭畀口供係感到好嘔心，同埋佢感到係好擔憂，你今次嘅決定亦都係一個相當面對勇敢嘅決定。

葉大律師亦都係呈咗上好多個判例，咁我就參閱過上訴庭喺呢個95年有個案件叫做英女皇訴彭兆康（譯音）就係CACC 698/95年，同埋呢個特別行政區訴李健新（譯音）CACC 111/2006。加上教導所報告亦都話認同你適合教導所，咁你所有承認嘅十條控罪，每一條我都係判你呢個接受教導所訓練。我並喺呢度一個建議，你喺教導所期間接受呢個心理輔導。