香港特別行政區 訴 林曉珣

DCCC860/2009

香港特別行政區

區域法院

刑事案件2009年第860號

----------------

----------------

判刑理由書

----------------

1.喺我決定一個新嘅判刑嘅時候，同埋之前，我首先第一樣考慮咗嘅，就係同案裡面另外一位第三被告人，嗰位譯音姓余嘅女士，而事實上亦都係姓余嘅女士，佢就住同類型嘅一個控罪，佢係被判處咗12個月嘅監禁，當其時嘅法官係用一個12個月嘅判刑起點喇，經過審訊之後被定罪，於是判刑12個月嘅。當然亦都清楚睇到佢嘅控罪裡面指佢「洗黑錢」嘅銀碼係40,000元，係雙倍妳嗰個控罪嘅數目。咁當然喇，本身40,000元喺「洗黑錢」嘅控罪裡面嚟講都唔係算太多嘅銀碼，而兩萬元就會係相對嚟講更加低嘅銀碼喇，呢一個我係首先考慮咗嘅。

2.當然喇，亦都考慮番嗰個案情裡面顯示，妳係收咗--同意用300鈫嘅酬勞，容許別人使用妳嘅戶口，咁而最終就係呢一個銀行戶口，畀人用咗嚟洗嗰兩萬鈫嘅黑錢。我亦都考慮到喺唔同嘅報告裡面，唔同嘅階段所得，唔同嘅報告知道妳嘅精神狀況、個人嘅一啲智力上面嘅情形，呢一個我係刻意咁樣加入去考慮嘅範圍之內，認為係一個頗重要嘅元素去考慮。

3.另外，我亦都會係考慮埋，根據感化官嘅報告所講，妳已經--雖然妳最終係違反咗社會服務令嘅條件，但係喺法庭加諸呢個刑期喺妳身上嘅期間，妳其實都係執行咗53個鐘另43分鐘嘅社會服務，咁而我計過，對比起妳嘅240小時呢一個社會服務令嘅刑期，其實都算做係執行咗百分之二十二點三八嘅社會服務令時間。

4.考慮過所有以上嘅因素，我係認為重新對妳判刑嘅時候，一個合適嘅判刑起點係9個月嘅監禁，9個月嘅監禁。但係妳已經做咗百分之二十幾，或者二十左右嘅工作，我認為對妳公平嘅情形，我會將呢一個9個月嘅刑期扣減大約百分之二十，扣減大概百分之二十之後，其實就會係稍為多過7個月嘅監禁，咁但係我衝量過所有事情之後，我認為7個月嘅監禁已經係一個合適嘅懲罰。所以最終就住呢一個嘅控罪，而家正式重新同妳採納嘅加諸喺妳身上嘅判罰，就係7個月嘅即時監禁，呢個係我嘅判刑。