香港特別行政區 訴 黃志添

HCCC 215/2017

[2018] HKCFI 2456

香港特別行政區

高等法院

原訟法庭

刑事案件2017年第215號

----------------

----------------

----------------------------------------

判刑
以下內容乃法庭數碼錄音謄本

----------------------------------------

官：　

上訴人今天喺本席席前承認經修訂公訴書（日期係2018年7月4日）上面嘅一項控罪，就係販運危險藥物罪，所牽涉嘅危險藥物係內含218.2克海洛英鹽酸鹽嘅256.2克混合劑。呢一項控罪係原本公訴書（日期2017年7月10日）上面嘅控罪二。為咗簡單起見，本席會將被告今天所承認嘅控罪簡稱為「控罪二」。至於原本公訴書上面嘅控罪一，被告人經審訊之後被裁定有罪，而本席亦都已經喺2018年2月28日就原本嘅控罪一判處被告入獄八年十個月。為咗方便起見，本席將原本公訴書嘅控罪一簡稱為「控罪一」。

關於被告人嘅背景與及案底同埋身體狀況，本席已經喺2018年2月28日嘅判刑裡面有所論及，現在不再重複。代表被告人嘅馬大律師亦都確認，被告人嘅背景冇甚麼顯著嘅分別。

就被告今次承認嘅控罪二，根據上訴法庭給予嘅判刑指引－女皇訴劉德明（[1990] 2 HKLR 370），販運200至400克海洛英鹽酸鹽嘅量刑起點係12至15年監禁。如果純粹以數學方式計算，控罪二所牽涉嘅毒品劑量將會得出一個十二年三個月嘅量刑起點。正如本席喺上一次2018年2月28日判刑嘅時候所講，根據香港特別行政區訴梁貴平（譯音）及其他人（第2案）（[2003] 2 HKC 575），上訴法庭重申，判刑起點主要係取決毒品嘅數量。至於被告人作為運送者嘅角色，並不是獲得額外減刑嘅原因。

被告人今次喺重審排期嘅時候表示佢將會喺呢一次認罪嘅，根據上訴法庭喺香港特別行政區訴吳文南（[2016] 5 HKC 231）嘅案例裡面，如果係撇除重審嘅情況不談，以排期前表示認罪得到嘅量刑折扣，將會係低於喺交付程序就已經認罪嘅三分之一。上訴法庭表示，喺交付程序之後、排期之前得到嘅量刑折扣應該係唔超過百分之二十五，亦即係四分之一。今次係重審嘅情況，喺吳文南嘅案例裡面冇交代到，如果係重審嘅話，量刑折扣應該係畀幾多。但係喺吳文南之前嘅案例就有提到，如果係重審嘅情況認罪嘅話，得到嘅折扣係大概係四分之一。當然，法庭根據唔同案件嘅情況，係可以酌情調節，相關嘅案例係HKSAR v Chui Chi Wai & another（第2案）（[2000] 1 HKLRD 704）。

本席考慮過兩位大律師嘅陳詞，亦都考慮到本案嘅處境，被告人目前係65歲，與及被告人嘅家庭狀況等等，本席係給予被告人一個睇嚟會係比較慷慨嘅折扣；亦即係話，就被告目前所承認嘅控罪二，本席會給予四分之一嘅量刑折扣。以控罪二十二年三個月嘅量刑起點，給予四分一嘅折扣之後，得出嘅刑期就係九年兩個月。呢一個係被告人須要就控罪二面對嘅刑期。

但係本席亦都需要考慮到整體原則，因為上一次2018年2月28日嘅時候，就控罪一被告已經被判八年十個月監禁，而根據被告人目前所承認嘅同意案情，控罪一同控罪二嘅毒品係來自同一來源，兩項控罪亦都係同一日發生。喺咁嘅情況之下，本席認為考慮整體原則嘅時候，適宜將控罪一同控罪二所涉及嘅毒品劑量一併考慮。如果將上一次被告人所承認嘅控罪（控罪一）裡面嘅82.5克海洛英鹽酸鹽同今次被告人所承認嘅218.2克海洛英鹽酸鹽混合考慮嘅話，得出嚟嘅總重量就係300.7克。根據劉德明嘅判刑指引，兩項控罪如果被告人係經審訊之後被定罪嘅話，整體嘅刑罰，兩位大律師亦都同意，大概係十三年六個月。當然呢個係未考慮到任何求情理由之前嘅刑罰。喺今次被告人係承認控罪，係得到百分之二十五嘅量刑折扣，但係呢一個嘅減刑理由並不適用於上一次嘅定罪。喺考慮今次嘅被告人所承認嘅控罪，當中有多少因為整體原則嘅緣故，係需要同上次佢經定罪之後被判嘅刑罰，同期或者分期執行嘅時候，本席認為有一啲嘅參數係可以考慮。即係話如果被告人當初面對嘅兩項控罪全部都係經審訊之後定罪嘅話，總刑期大概就會係十三年六個月，但係如果被告人當初係喺審訊嘅第一天同時承認兩項控罪嘅話，根據吳文南，如果給予被告人四分之一嘅量刑折扣，得出嘅總刑期就會係大概十年一個月。以目前嘅情況，被告人控罪一係經審訊之後被定罪，控罪二係今天承認控罪，所以被告人嗰個整體嘅刑期應該係介乎十年一個月同十三年六個月之間。

喺考慮兩項控罪嘅整體刑罰嘅時候，本席考慮到兩項控罪毒品嘅比重，考慮到控罪一係經審訊後被定罪，控罪二係被告承認控罪，本席認為兩項控罪嘅總刑期以11年監禁為合適。為咗達到呢一個目的，本席下令將今次被告人所承認嘅控罪嘅刑期當中嘅兩年兩個月同上一次被告人嘅刑期（即係八年十個月嘅刑期）分期執行，而今次呢項控罪嘅其餘刑期就同上一次嘅刑期同期執行，得出一個總刑期就係11年監禁。