香港特別行政區 訴 梁汶康

DCCC 311/2014

香港特別行政區

區域法院

刑事案件2014年第311號

----------------

----------------

----------------

判刑理由書

----------------

1.被告梁先生你係承認一項販運危險藥物罪，違反香港法例第134章《危險藥物條例》第4（1）（a）及（3）條。

2.本案嘅案情相對簡單，簡而言之，就係閣下喺販毒嘅時候畀警察截獲，喺你身上面搵到一共一百八十七小包嘅毒品，內含總共41.26克嘅固體，其中有20.42克嘅可卡因。毒品嘅市面零售價約值港幣54,000鈫。

3.被告你今年係27歲，同你嘅同居伴侶育有一名7歲嘅兒子，現在係就讀小學。你由2002年起一直到2009年有八次嘅定罪紀錄，最後兩項係管有危險藥物罪。

4.代表你嘅李大律師向法庭確認案發嘅時候你已經冇毒癮，本席亦都接受你係因為家庭經濟嘅緣故而犯罪，但係法庭喺過往嘅案例裡面亦都講得好清楚，因經濟原因而犯罪唔係一個求情嘅理由，直接同本案類似嘅案例包括香港特別行政區訴李民偉（CACC 386/2005）。李大律師已經非常之盡責咁將所有可以為你求情嘅說話都講咗，而根據上訴法庭喺兩件案件嘅案例，分別係AG v Pedro Nel Rojas（[1994] 1 HKC 342）同埋女皇訴劉德明（[1990] 2 HKLR 370），販運10至到50克嘅可卡因，量刑起點係5至8年，而根據本案，涉及毒品嘅數量亦都係喺呢一個範圍之內。

5.本席詳細考慮咗呢件案件嘅案情，同埋李大律師所有為你作出嘅求情理由同埋你家庭嘅情況，我亦都考慮到你過往雖然有涉及危險藥物嘅案底，但係未試過係干犯販運罪。喺法庭酌情權嘅範圍之內，本席打算畀多一次嘅機會畀你，採納一個比較低嘅量刑起點，本席以五年三個月監禁為量刑起點，而你因為坦白認罪，係會得到三分之一嘅折扣。五年三個月即係等於63個月，減去三分之一嘅認罪折扣之後係42個月監禁。呢個就係法庭今次畀你嘅判刑，我希望你可以珍惜今次嘅機會，以後唔好再喺法庭度出現。