被告人早前喺裁判法院承認咗一項販運危險藥物罪，由被交付高等法院原訟法院判處。
今日被告人喺本席席前確認承認控罪，本席亦都確認咗被告人罪名成立。
喺判處嘅時候，本席顧及咗整體情況，包括案件嘅性質同埋情節，所涉危險藥物嘅種類同埋份量，被告人嘅個人背景，同埋辯方大律師嘅求情陳詞。案情可以簡述如下：
被告人喺屯門鐵路車站被截停，警員喺佢帶住嘅一個紙袋裡面發現八包「冰」毒，份量係內含1.89公斤嘅甲基苯丙胺鹽酸鹽嘅兩公斤晶狀固體。喺被捕之後，被告人承認佢為咗3,000元嘅報酬，答應別人將呢一啲危險藥物帶到紅磡，佢指出，佢因為已經失業一年，冇晒錢，面臨破產，先至答應咁樣做。
被告人現年20歲，中三學業程度，同母親與姐姐同住。被告人並非初犯嘅，2008年，當時未足14歲，因為串謀盜竊、盜竊同埋普通襲擊罪，被判感化。2014年12月，當時被告人已經因本案被捕，佢喺法庭因為一宗管有危險藥物罪，被判進入戒毒所接受治療。
辯方陳大律師喺求情嘅時候指出，被告人係喺一個單親家庭長大，父親喺被告人8歲嘅時候已經離開咗家庭，留下四名子女，由被告人母親獨力撫養，因為無力兼顧，母親曾經將被告人交由佢嘅祖父母照顧咗數年，喺咁嘅情況之下，被告人冇得到適當嘅管教，中三之後，被告人有感母親擔子重，就開始工作，任職售貨員，每個月將大約2,000鈫交畀母親作家用，可惜被告人誤交損友，終於染上毒癮，亦都因為服用危險藥物，喺2014年7月曾經患上思覺失調，要進院治療，留院大概兩個月之後已經無大礙。陳大律師亦都確認被告人嘅精神健康情況不致影響被告人干犯本案，各項嘅罪行元素都確立，但係佢請法庭喺判處嘅時候顧及被告人嘅精神健康。喺出院之後，被告人未能夠找到工作，亦都因為使用信用卡欠下債項，喺經濟壓力之下，被告人被人利用，干犯咗本案。
陳大律師指出，被告人已經十分後悔，有充分悔意，亦都強調今次係被告人第一次干犯販運危險藥物罪，而且佢喺法庭已經第一時間承認控罪。陳大律師亦都指出，被告人嘅家人對被告人依然關心同埋支持，佢嘅家姐亦都寫信為被告人求情。陳大律師亦都請法庭顧及被告人尚算年青。陳大律師確認咗被告人係知道佢當時管有嘅係危險藥物，只係唔清楚份量，辯方亦都不會要求法庭聽取精神科報告，陳大律師指出，聽取報告對法庭考慮量刑嘅幫助不大。
喺考慮刑期嘅時候，法庭應該顧及被告人販運嘅危險藥物嘅實際純含量，被告人不清楚佢販運嘅危險藥物嘅份量，並非係重要嘅考慮因素。
本案喺2014年11月12日干犯，上訴法庭嘅案例譚伊真（CACC 524/2011）係適用嘅，喺該案，上訴法庭指出，販運「冰」毒嘅人，如果毒品純含量超過600克嘅話，就應該採用Abdallah一案裡面嘅量刑指引，根據Abdallah（CACC 304/2008）一案，如果毒品純含量係1,200克至到4,000克嘅話，應該考慮判處23至26年監禁。
被告人係年青嘅，但係干犯本案嘅時候已經係成年人。考慮咗整體情況，本席認為採用二十三年半作為量刑基準係合適嘅，被告人承認控罪，亦都有悔意，因此應該得到三分一嘅刑期扣減，此外，顧及陳大律師嘅求情陳詞，本席認為可以給予被告人多兩個月嘅刑期扣減。
被告人，請起立，基於上述理由，本席判你就本案控罪，監禁十五年半。