香港特別行政區 訴 楊年芳

HCCC 35/2021

[2023] HKCFI 1050

香港特別行政區

高等法院

原訟法庭

刑事案件2021年第35號

----------------

----------------

----------------------

判刑

以下內容乃法庭數碼錄音謄本

----------------------

官：　

被告人被控一項販運危險藥物罪，佢不承認控罪，經審訊之後被裁定罪名成立。喺考慮判處嘅時候，本席顧及咗整體情況，包括案件嘅性質同埋情節，所涉危險藥物嘅種類同埋份量，被告人嘅個人背景同埋辯方律師嘅求情陳詞。

本案案情可以簡述如下：

被告人喺機場到港大樓被截停，佢剛剛從馬來西亞檳城經泰國曼谷飛嚟香港，關員從佢嘅寄艙行李箱裡面發現其中三件衣服分別包裹著東西，三件東西都用膠紙、碳紙同埋氣泡紙包裹住，內裡嘅東西外表係茶葉包，內容係涉案嘅危險藥物，呢三件東西其中一件有被告人的指紋，指紋喺用嚟包住其中一包外表係茶葉包嘅東西嘅膠紙上發現，涉案危險藥物係內含2,982克嘅甲基苯丙胺鹽酸鹽嘅2,997克晶狀固體。

喺審訊時，被告人有出庭作證，簡而言之，佢承認涉案行李箱係佢嘅，亦都知道嗰三件東西嘅存在，但係唔知道內容係危險藥物。佢話嗰啲東西係一個叫Mandy嘅朋友喺馬來西亞送畀佢嘅生日禮物，Mandy話畀佢聽物品係水晶，所以佢以為係水晶。

被告人係香港永久居民，原名周小妹（譯音）。根據佢嘅證詞，佢有兩段婚姻，第一任丈夫係香港人，二人喺2009年離婚；之後佢同一名澳洲男士結婚，並且去咗澳洲居住。佢喺內地接受教育，只有小五程度，13歲就出嚟工作，喺工廠工作咗一年就升為總管，當咗總管大概四年，十七八歲嘅時候就經營一間卡拉OK餐廳。之後佢嚟到香港，曾經喺電腦公司擔任文書工作，亦都曾經做校工同埋醫院嘅清潔工。辯方鄺律師請法庭顧及以下嘅情況，對被告人盡量從輕：一，被告人干犯本案嘅時候48歲，之前從來都冇犯事紀錄；二，本案並非外地人將毒品帶進香港嘅情況，被告人係本港嘅居民。

被告人販運嘅係「冰」毒，毒品純含量係2,982克。根據案例譚伊真CACC 524/2011，應該以Abdallah案CACC 304/2008嘅判刑指引作為判處嘅考慮依歸。

根據Abdallah案，若販運嘅相關毒品純含量為1,200至4,000克嘅時候，應該考慮23年至到26年嘅監禁刑期。單以涉案毒品份量嚟作考慮，量刑基準應該係24年1個月，本案涉及被告人將毒品從外地帶進香港係加刑因素。喺參考咗案例如Abdallah案、鍾炳焜案CACC 85/2014同埋Benites Cerna案CACC 366/2016，本席認為刑期應該增加23個月。

被告人，請起立。本席考慮咗整體情況，認為案中並無足以減刑嘅因素，據上述理由判處妳因本案罪行監禁26年。