香港特別行政區 訴 羅丙琴

HCCC 106/2015

香港特別行政區

高等法院

原訟法庭

刑事案件2015年第106號

----------------

----------------

----------------------

判刑
以下內容乃法庭數碼錄音謄本

----------------------

官：　

第二被告人羅丙琴喺本席前承認一項販運危險藥物罪，違反香港法例第134章《危險藥物條例》第4（1）（a）及（3）條。第二被告所承認嘅係本案第二項控罪。

罪行詳情指，羅丙琴於2014年7月24日喺香港九龍旺角上海街，非法販運危險藥物，即內含1,312克甲基苯丙胺鹽酸鹽的1,366克晶狀固體。

第二被告人亦都承認咗控方所備就關於第二項控罪嘅案情撮要，該案情撮要如下：

「於2014年7月24日約15：09時，第二被告於香港九龍旺角上海街與雅蘭街交界被警方截停。

同日約15：13時，在香港九龍旺角上海街703號外，女偵緝警員9132號林月玲：

（a）於第二被告手持的一個黑色Facesss環保袋（控方證物第8號）內搜出一張藍白色膠紙（控方證物第9號）包住一個白色膠袋（控方證物第10號）內藏十八個紅邊透明可再封膠袋（控方證物第11號）均載有透明晶體，經政府化驗師陳淑妤化驗後證實為共487克晶狀固體內含473克『冰』毒。

（b）於第二被告所攜帶的黑色Hello Kitty袋（控方證物第12號）內發現一個透明可再封膠袋（控方證物第13號）內有透明晶體，經政府化驗師陳淑妤化驗後證實為384克晶狀固體內含369克『冰』毒；及

（c）於第二被告穿於腰間及褲頭對上的粉紅色平胸無肩帶上衣（控方證物第14號）內搜出一張藍白色膠紙（控方證物第15號）包住一個白色膠袋（控方證物第16號）內藏一個透明可再封膠袋（控方證物第17號）內有透明晶體，經政府化驗師陳淑妤化驗後證實為495克晶狀固體內含470克『冰』毒。

於第二被告身上所攜帶的東西中，共搜獲1,366克晶狀固體內含1,312克『冰』毒，市值港幣611,968元。

於同日約15：15時，警方以販運危險藥物罪拘捕第二被告。第二被告於警誡下保持緘默。

於2014年7月25日01：37至02：11時，第二被告於旺角警署進行錄影會面。第二被告於會面錄影中多次拒絕回答任何與危險藥物有關的問題。」

本案所涉嘅罪行係販運「冰」毒。根據律政司訴程國雄（譯音）[1991] 2 HKLR 125、香港特別行政區訴 Abdallah Anwar Abbas [2009] 2 HKLRD 437及香港特別行政區訴譚伊真（譯音）[2014] 3 HKLRD 691第34段等嘅案例，上訴法庭訂下嘅量刑指引：販運大量（即是由600克起計）嘅「冰」毒，則販運相同重量嘅海洛英嘅量刑指引係適用，販運1,200克至4,000克嘅「冰」毒，刑罰應該係由23年至26年嘅監禁。以第二被告人承認嘅第二項控罪，所涉及嘅販運1,312克「冰」毒，量刑基準以算術計算，應該約為二十三年一個半月監禁。

第二被告人喺1972年喺國內出生，2001年移居香港，現年係43歲，有八次嘅犯罪前科，兩次涉及危險藥物，其中一次係管有危險藥物，而另外一次更係販運危險藥物。

張耀良大律師代表第二被告人向本席求情，要求輕判被告人，而被告人同埋佢嘅丈夫都致函本庭，道出被告人心中嘅悔意，希望法庭重輕發落。然而，販運毒品係好嚴重嘅罪行，被告人嘅身世、背景等等，都難以構成求情輕判嘅因素。唯一一個最有效嘅減刑因素就係承認控罪，應該獲三分之一嘅刑期扣減。就第二被告人承認嘅第二項控罪而言，本席以23年監禁為量刑基準。因為她承認控罪，而給予三分之一嘅扣減，故此，判處第二被告人十五年四個月監禁。