香港特別行政區 訴 陳錦滔

HCCC 106/2015

香港特別行政區

高等法院

原訟法庭

刑事案件2015年第106號

----------------

----------------

----------------------

判刑
以下內容乃法庭數碼錄音謄本

----------------------

官：　

第一被告人陳錦滔喺本席面前承認一項販運危險藥物罪，係違反香港法例第134章《危險藥物條例》第4（1）（a）及（3）條。第一被告人所承認嘅係第一項控罪。

罪行詳情指，第一被告陳錦滔Jackey於2014年7月24日在香港九龍旺角上海街，非法販運危險藥物，即內含30.30克甲基苯丙胺鹽酸鹽的30.60克晶狀固體。該危險藥物俗稱為「冰」。

第一被告人亦都承認咗控方所備就關於第一項控罪嘅案情撮要，該案情撮要如下：

「於2014年7月24日約15：10時，警方於旺角雅蘭街14號外馬路截停第一被告。

第一被告及後被警方帶到上海街703號1樓8號房賓館作出搜查。約15：24時到15：34時，偵緝警員2197號徐子旻於賓館內對第一被告作出搜身，並在他的內褲左邊褲頭貼住肉的位置上發現一個有Hello Kitty字樣的透明可再封膠袋（控方證物第1號）內有透明晶體及一個紅邊透明可再封膠袋（控方證物第2號）內藏透明晶體。

經政府化驗師陳淑妤化驗後，兩個膠袋內的透明晶體證實為30.60克晶狀固體內含30.30克甲基苯丙胺鹽酸鹽（俗稱『冰』毒），市值係港幣13,709元。

偵緝警員2197號徐子旻於被告手持的銀色旅行袋（控方證物3）內搜出一個銀色電子磅連藍色蓋（控方證物4）及一隻紅色襪（控方證物5）內有一包印有Hello Kitty字樣的透明可再封膠袋（控方證物6）及兩包有紅邊的透明可再封膠袋（控方證物7）。

偵緝警員2197徐子旻其後以販運危險藥物罪拘捕第一被告。第一被告於警誡下保持緘默。

於2014年7月25日00：36時至01：01時、18：06時至18：35時及18：51時至19：33時，第一被告於旺角警署進行會面錄影。第一被告於會面錄影中否認販運危險藥物罪。」

本案嘅罪名係販運「冰」毒。根據律政司訴程國雄（譯音）[1991] 2 HKLR 125、香港特別行政區訴 Abdallah Anwar Abbas[2009] 2 HKLRD 437及香港特別行政區訴譚伊真（譯音）[2014] 3 HKLRD 691第34段等案例，上訴法庭訂下咗量刑指引：販運10至70克嘅「冰」毒，刑罰應為7至11年監禁。以第一被告人所承認嘅第一項控罪，涉及嘅販運30.30克「冰」毒，量刑基準以算術計算，應該約為八年四個月監禁。

第一被告人喺1973年喺國內出生，現年係42歲，有五次嘅犯罪前科，但係都與本案嘅不類同。

袁國華大律師代表第一被告人向本席求情，要求輕判第一被告人。然而，販運毒品係好嚴重嘅罪行，被告人嘅身世、背景，都難以構成求情輕判嘅因素。唯一一個最有效嘅減刑因素就係承認控罪，應該獲三分之一嘅刑期扣減。就第一被告人所承認嘅第一項控罪而言，本席以八年三個月監禁為量刑基準。有鑒於第一被告人坦然承認控罪以及喺本案嘅檔案之中存有嘅資料，本席可以對第一被告網開一面，係給予佢一個相當大嘅扣減，判處佢入獄係四年七個月，係判佢四年七個月監禁。