香港特別行政區 訴 賴錦鋒

HCCC 348/2018

[2019] HKCFI 1055

香港特別行政區

高等法院

原訟法庭

刑事案件2018年第348號

----------------

----------------

-------------------------------------

判刑
以下內容乃法庭數碼錄音謄本

-------------------------------------

官：　

引言

被告人被控以一項販運危險藥物罪，涉及嘅毒品係內含42.2克可卡因嘅47.9克固體（P1）。經審訊後，被陪審團一致裁定罪名成立。

根據控方案情，警員8745（PW1）同佢嘅拍檔警員高級警員58706（PW2），喺2018年4月4日，在大圍港鐵站及村南道一帶，著便裝執勤。晚上約10時54分，PW1發現被告人形跡可疑，懷疑佢管有毒品，於是通知PW2，兩人一齊上前，將被告人截停。後來PW1在被告左手手持嘅一個白色紙袋（P7）裡面，搵到兩個透明可再封膠袋（P8）內有思疑毒品（P1），後來PW1以販毒嘅罪名，將被告人拘捕。P1經化驗後，證實係控罪所列嘅可卡因，而以當時嘅平均零售價計算，約值港幣45,000元。

被告人背景

被告人現年22歲，香港出生，未婚。佢接受教育至中三程度，有三合會背景，報稱係裝修工人，與父母同住於一個公屋單位。

被告人過往有三次出庭紀錄，涉及三項定罪，包括販運危險藥物（2012年）、盜竊（2013）及管有危險藥物（2016）。基於被告人販運危險藥物罪嘅案底係發生喺佢16歲嘅時候，當時佢被判進入更生中心；而另一項同毒品有關嘅案底係管有危險藥物罪，被判入獄8個月。量刑嘅時候，本席不會以被告人有同類型犯罪紀錄，作為加重刑罰嘅因素。但另一方面，佢亦並非係一個清白冇案底嘅人。

量刑

在HKSAR v Leung Kwai Ping and Another（No.2）（[2003] 2 HKC 575）及HKSAR v Kilima Abubakar Abbas（[2018] HKCA 602）等判例，上訴法庭一再重申，販毒罪嘅判刑主要係根據相關嘅判刑指引，依據毒品嘅數量，以數學方式計算刑期起點。除非有好嘅理由，否則法庭量刑嘅時候，不應偏離以該數學方式得到嘅量刑起點。再者，上訴法庭亦一再表明，即使被告人只係擔當運送者嘅角色，呢個並非係可以獲得減刑嘅理由（參見HKSAR v Godson Ugochukwu Okoro，[2019] HKCA 158）。

根據上訴法庭在Attorney General v Rojas（[1994] 1 HKC 342），非法販運可卡因嘅判刑，係依循非法販運同等數量海洛英嘅判刑指引。對於販運10克至50克海洛英嚟講，適用嘅判刑指引來自R v Lau Tak Ming and Others（[1990] 2 HKLR 370），係5至8年監禁。因此，以數學方式計算，販運42.2克可卡因嘅量刑起點係七年又四點九八個月監禁，但顧及被告人始終算係比較年輕，本席酌情將起點訂為七年四個月監禁。

被告人係經審訊之後被定罪，被告人父親患有末期肺癌，以及被告人自己有一邊耳有百分之八十失聰，呢兩點並非係減刑嘅理由。本席相信被告人嘅代表李大律師已經盡力，但上級法庭嘅判例對本法庭有約束力，而李大律師亦都未能夠提出任何足以構成減刑嘅求情理由，本席亦睇唔到有任何理由可以將被告人嘅懲罰下調，因此本席判處被告人入獄七年四個月。