香港特別行政區 訴 鄧浩賢

HCCC 323/2018

[2019] HKCFI 905

香港特別行政區

高等法院

原訟法庭

刑事案件2018年第323號

----------------

----------------

-----------------------------------------

判刑

以下內容乃法庭數碼錄音謄本

-----------------------------------------

官：　

引言

被告人在裁判法院承認一項「販運危險藥物罪」，被交付本法院判刑。

控罪指佢喺2018年2月12日，在香港北角英皇道416至438號一座大廈外面，非法販運42.12克晶狀固體，內含41.42克甲基苯丙胺鹽酸鹽（俗稱「冰」毒）、4.38克固體，內含4.06克可卡因及6.96克晶狀固體，內含3.38克氯胺酮。

今日，被告人在本席席前確認控罪，並承認控方案情。

案情

根據同意案情，2018年2月12日晚上9時20分左右，被告人在控罪提及的大廈外面，被警方截停。警方人員在被告人右前褲袋搵到兩包思疑毒品，左邊襪裡面搵到三十二包思疑毒品，及在右邊襪搵到十四包思疑毒品。

被告人在拘捕及警誡下保持緘默，但係喺後來嘅一個錄影會面紀錄裡面，佢承認收到某人嘅電話，指示佢運送涉案毒品畀其他人。被告人話，佢案發當日晚上九點左右，喺油塘收到毒品之後，打算將毒品送到北角，事成的話，佢會得到每包毒品50元嘅報酬。但係佢喺未曾成功運送毒品畀任何人之前，就已經被拘捕。

上述思疑毒品經化驗之後，證實係控方所列嘅毒品，總零售價為港幣31,150元。

被告人背景

被告人在香港出生，現年35歲，受教育至中三程度，報稱無業，與母親及弟弟同住一個公屋單位。

被告人自稱有黑社會背景，並且濫用氯胺酮達十五年之久。刑事紀錄方面，佢在1998年至2014年間共有四次出庭紀錄，涉及五項定罪，包括一項刑事毀壞（1998）、兩項管有危險藥物罪（2002及2014）及兩項販運危險藥物罪（2009及2014），對上一次出獄嘅日期係2015年6月6日。

量刑

上訴法庭在HKSAR v Leung Kwai Ping & Anor（No.2）（[2003] 2 HKC 575）及HKSAR v Kilima Abubakar Abbas（[2018] HKCA 602）等案例一再重申，販毒罪嘅量刑起點，主要係取決於涉案毒品嘅份量。除非有好理由，否則法庭不應偏離此量刑起點。而被告人在販毒罪行當中，只係擔當運送毒品嘅角色，並非係偏離判刑指引嘅好理由：HKSAR v Godson Ugochukwu Okoro（[2019] HKCA 158）。

本案涉及三種不同種類嘅毒品。基於佢哋嘅重量及毒性，本席認為當中以「冰」毒為主。在法庭邀請下，控方根據HKSAR v Chan Yuk Leung（CACC 318/2013）嘅判例，分別以荒謬法（absurdity test）、轉換法（conversion test）及比例法（ratio test）計算量刑起點。辯方對控方嘅計算結果沒有異議，而本席比對控方計算及本席嘅計算，兩者結果亦相約。

荒謬法

根據上訴庭在HKSAR v Tam Yi Chun（[2014] 3 HKLRD 691）嘅判刑指引，若以數學方式計算，販運41.42克約「冰」毒，量刑起點將為九年一個月監禁。而如果全部48.86克毒品都係「冰」毒的話，量刑起點會係九年七個月。

根據Attorney General v Rojas（[1994] 1 HKC 342）及R v Lau Tak Ming & Anor（[1990] 2 HKLD 370）嘅量刑指引，若純以數學方式計算，運送4.06克可卡因的量刑起點為3年監禁，如果全部48.86克毒品都係純海洛英的話，量到起點將會係七年十一個月。

根據Secretary for Justice v Hii Siew Cheng（[2009] 1 HKLRD 1），販運3.38克純氯胺酮嘅量刑起點係兩年六個月監禁，而如果全部48.86克毒品都係純氯胺酮的話，量刑起點會係五年十一個月。

基於以上，販運本案所有毒品嘅量刑起點，若果純以數學方式計算，未曾顧及其他量刑因素之前，不應高於九年七個月。

轉換法

販運4.06克純可卡因的刑期，相當於販運少於1克的「冰」毒，而販運3.38克純氯胺酮的刑期亦然：參見香港特別行政區訴曾志華（[2010] 5 HKLRD 370）。

因此，在計算刑期嘅時候，販運本案所有嘅毒品相當於販運約42克純「冰」毒。根據HKSAR v Tam Yi Chun嘅判刑指引，販運呢個份量嘅「冰」毒，量刑起點會係約九年兩個月監禁。

比例法

涉案「冰」毒、可卡因及氯胺酮分別佔毒品總重量嘅百分之84.8、8.3及6.9。以此比例計算，販運41.42克純「冰」毒、4.06克純可卡因及3.38克純氯胺酮的總刑期將會係九年兩個月監禁。

加刑因素

如前所述，本席在量刑時，除咗要顧及本案各種毒品嘅重量之外，亦都要考慮到其他嘅量刑因素。在本案，其他嘅量刑因素包括：（一）被告人係販運不同種類嘅毒品，讓佢能夠接觸到不同需要嘅買家，因此會有一個比較廣大嘅巿場。呢個係加刑因素：HKSAR v Remirez [2015] 1 HKLRD 966判詞第19段；（二）上訴庭有案例說明，假若「冰」毒與氯胺酮被混合使用的話，相對於使用單一毒品，會對濫藥者帶來更嚴重嘅損害：HKSAR v Chan Yuk Leung前述，判詞第25段；（三）被告人有同類到嘅前科，被告人有合共四項同毒品有關嘅定罪紀錄，佢曾經因為販運危險藥物，喺2009年同2014年，分別被判入獄50個月及32個月。本席認為被告人的刑事定罪紀錄，顯示佢嘅罪行有一定嘅持續性（persistence），佢以往所受嘅刑罰對佢冇阻嚇作用，亦冇從中汲取教訓，呢個係一個加刑嘅因素：HKSAR v Chan Pui Chi（[1999] 2 HKLRD 830）。

在比較過以上三種計算方法嘅結果、顧及所有加刑因素以及參考HKSAR v Chan Yuk Leong嘅判刑之後，本席認為若經審訊後，對本案以及被告人合適的量刑起點會係九年三個月監禁。

判刑

被告人及早在交付程序中認罪，按照慣例，可得三分之一嘅量刑扣減，將刑期由九年三個月減為六年兩個月監禁。

林大律師已經盡力為被告人求情。被告人親筆手寫嘅求情信，本席亦都已經考慮過。本席認為，以本案嘅情況同被告人嘅背景，本席所採納嘅量刑起點係合適。而除咗及早認罪之外，本席不認為被告人有可以進一步減刑嘅理由。因此，本席判處被告人入獄六年兩個月。本席相信在服刑完畢之後，被告人仍然有充足嘅機會可以重新做人。