案情指，警員喺訓示之後，喺一個反毒品行動中截停正預備登上一部私家車嘅被告，並喺佢個手提包內搜獲本案嘅毒品，包括兩袋嘅「冰」、一袋海洛英，以及十排一共100粒嘅藥丸。被告承認知道嗰啲係毒品，並稱係自用嘅。毒品經過化驗之後，證實為54.24克晶狀固體內含50.29克甲基苯丙胺鹽酸鹽、27.85克固體內含14.17克海洛英鹽酸鹽，以及100粒內含1.27克咪達唑侖嘅片劑。所有嘅毒品，總市值為港幣55,072元。
被告現年40歲，一共有三項嘅刑事紀錄，全部同毒品有關。其中一項喺1986年因為販運危險藥物而被判去教導所服刑，另外兩項嘅都係牽涉管有危險藥物，最後一項喺2000年，被判去戒毒所服刑。
大律師求情嘅時候表示，被告已婚，有一個14歲嘅女同埋一個兩個月大嘅兒子，之前係家庭嘅經濟支柱。大律師指，被告曾經成功戒除毒癮。喺2006年轉任的士司機，因為工作壓力大，又碰番有毒癮嘅損友，所以再度沾染毒癮，受人唆擺之後先至鋌而走險，干犯本案，希望能夠賺多少少金錢。
本席喺量刑嘅時候，考慮咗本案嘅案情、毒品嘅種類、重量同埋量刑指引、被告認罪以及大律師求情，亦都閱讀咗被告人以及佢家人所撰寫嘅求情信。本案涉及數種嘅毒品，包括50.29克嘅甲基苯丙胺鹽酸鹽、14.17克嘅海洛英鹽酸鹽，以及1.27克咪達唑侖嘅片劑。就「冰」毒本身嘅量刑指引而言，本案嘅冰毒納入10至到70克，即係7至10年嘅起刑點界別；而海洛英鹽酸鹽則納入10至到50克，即係5至到8年嘅起刑點界別。根據香港特別行政區 訴 葉碧貴（譯音） [1999] 3 HKLRD 42，如果案例涉及販運多於一種毒品，法庭喺量刑嘅時候，即使毒品性質及量刑指引不同，一般嘅做法係首先考慮案中所有毒品嘅總重量，以釐定適當嘅起刑點。
上訴庭喺香港特別行政區 訴 張國良（譯音）Lowence CACC 539/2002一案中係咁講嘅： “We acknowledge however that it can be a difficult and complex task to sentence offenders who traffick in, or possess quantities of, a number of different drugs, In a case such as the present one the starting point should be based on the total narcotic content of the most serious drug, or drugs where the tariff guidelines are co-equal.”
喺香港特別行政區訴 鄭日明 CACC 455/2006一案中，上訴庭指出： “The difficulty being faced in cases of this kind where either an ‘individual’ or a ‘combined’ approach is adopted only arises where the sentencing brackets for the types of drugs are markedly different. Where drugs of a comparable kind, such as heroin, cocaine and methamphetamine hydrochloride（ice）are being trafficked the ‘combined’ approach, where a global sentence is taken, can usually be used.”
由此可見，上訴庭認為海洛英鹽酸鹽以及甲基苯丙胺鹽酸鹽屬可相約處理嘅毒品（drugs of a comparable kind），而事實上葉碧貴案所涉及嘅海洛英鹽酸鹽以及甲基苯丙胺鹽酸鹽嘅總重刑係32.50克，較之本案所涉嘅海洛英鹽酸鹽同埋甲基苯丙胺鹽酸鹽總重量64.46克為低。上訴庭喺葉碧貴案中認為，無論將所有毒品嘅總重量當作海洛英鹽酸鹽，又或者當作甲基苯丙胺鹽酸鹽計算嚟釐定起刑點，9年嘅起刑點係合適嘅。
本案所有嘅毒品總重量稍低於70克，本席認為無論將所有嘅毒品總重量當晒係海洛英鹽酸鹽又或者係「冰」毒計算嚟釐定起刑點，甚至或者以葉碧貴案件所指嘅組合方式處理，即係以主要嘅毒品予以起刑點，然後因應其他數量可觀嘅毒品將起刑點往上調。一個總數嚟計，10年嘅起刑點係合適嘅。予以三分之一嘅認罪扣減，判刑80個月。