本案被告承認一項販運危險藥物罪。
案情指，警員觀察到被告從一輕型客貨車落車，喺酒樓外徘徊一會，之後返番去客貨車，隨後客貨車駛離有關嘅地點。大約五分鐘之後，警員又發現該車，以及目睹被告將一啲錢交予司機之下，步入商場，警員尾隨，並且喺一個快餐店中截停被告，將佢帶到男洗手間，搜身之後，發現佢嘅外套袋入面藏有數包毒品。喺警誡之下，被告聲稱嗰啲「四仔」係佢自用嘅，後來，被告喺錄影之下亦都承認毒品係佢當日較早前以一半嘅價錢購入，打算將毒品帶出境，去到佢大陸嘅屋企自用。
毒品經過化驗之後，證實為內含1.52克甲基苯丙胺鹽酸鹽嘅1.62克晶狀固體，以及內含42.21克海洛英鹽酸鹽嘅55.82克混合劑，市值喺當時嚟講大約係44,900鈫。
被告有過七次嘅定罪紀錄，喺1996年曾經係有販運危險藥物嘅定罪紀錄，被判監禁10年。而佢最後一次嘅刑事紀錄係喺2008年3月，因為管有第I類危險藥物以及管有危險藥物，被判監禁。
被告現年45歲，被捕時無業。根據大律師所求情講，佢係一名癮君子，喺2011年，右腳曾經多次做過手術，而拘捕當日亦都要倚仗拐杖步行。被告聲稱，大量購入毒品係作止痛用。大律師希望本席接納被告當時現場以及錄影嘅講法，予以寬大處理。
本案涉及兩種毒品，包括1.52克嘅「冰」毒同埋42.21克嘅海洛英鹽酸鹽。「冰」毒喺本案屬於少量，兩者加起上嚟，總重量係43.73克，如果納入海洛英嘅量刑界別係等於10至50克，即係5至到8年嘅起刑點，本席認為加上跨境嘅因素，一個八年半嘅起刑點係合適嘅。然而，被告自稱毒品全部係佢自用，佢係準備將毒品購買後帶出境，帶返大陸自己使用。咁樣嘅講法，對量刑而言係有分別嘅，因為案例清楚指出，喺缺乏實質否定被告講法嘅情況下，法庭必須以最有利於被告嘅事實，作為量刑嘅基礎〔見周錦龍案（CACC 68/2010）〕，而喺呢個層面底下，一般採用係本來起刑點嘅百分之七十五至到九十作為起刑點，再予以量刑嘅扣減〔見周俊生案（CACC 135/2011）。
喺考慮到被告所講，毒品係佢自用嘅情況以及層面之下，本席以7年作為本案嘅起刑點，予以三分之一嘅認罪扣減，判刑四年八個月。