黎超倫先生被控一項非法販運危險藥物罪名，違反香港法例第134章《危險藥物條例》第4條第（1）款（a）段以及第（3）款。
控罪指稱，你喺2015年7月24日，喺香港新界落馬洲管制站，非法販運危險藥物，即內含2,900克甲基苯丙胺鹽酸鹽的2,964克晶狀固體。
經過六日審訊，你被陪審團一致裁定罪名成立。你販運嘅係俗稱「冰」毒嘅危險藥物，唯一合適嘅判刑係即時監禁。
你販運嘅份量超出咗喺Ching Kwok Hung（[1991] 2 HKLR 125）一案之中所定下嘅判刑指引。控辯雙方都倚賴兩個案例：第一，HKSAR v Abdallah（[2009] 2 HKLRD 437）；第二個案例係HKSAR v Tam Yi Chun（CACC 524/2011）。兩個判例顯示，就住本案危險藥物嘅數量嚟睇，合適嘅判刑區間係23至26年。
代表你嘅曾大律師已經向本庭充分陳述咗你嘅背景，亦都向本庭指出咗求情嘅因素。你今年55歲，已婚，有一個女，你個女兒啱啱誕下一個孫女。你喺香港出生，讀到中三，犯案時你係一名中港貨車司機，月入二至三萬鈫。你本身係有糖尿病。你亦都有四項嘅犯事紀錄，其中三項係判罰款，最後一項係喺2008年干犯，判緩刑，緩刑期已經過咗。
曾大律師指出，呢啲定罪同毒品無關，而且係好耐之前發生。曾大律師亦都向本庭指出，控方證據未必可以清楚咁樣顯示「入口」呢個事實，而你作為一個被告，亦都唔係本案中嘅一個主腦人物。
本庭喺考慮相關嘅犯罪事實同埋求情因素之後，本庭嘅判刑如下：本庭採納嘅判刑起點係24年，本案中有跨境因素，加刑1年，即係話你嘅刑期係25年，即時服刑。