香港特別行政區 訴 吳偉樂

HCCC 166/2015

香港特別行政區

高等法院

原訟法庭

刑事案件2015年第166號

----------------

--------------------

----------------------

判刑
以下內容乃法庭數碼錄音謄本

----------------------

官：　

被告人承認一項販運危險藥物罪，本席喺判處嘅時候考慮咗案件嘅整體情況，包括案件嘅性質同埋情節、被告人嘅個人背景同埋辯方大律師嘅求情陳詞。

本案嘅案情可以簡述如下：2014年11月16號，被告人將一箱物品帶到DHL，將嗰箱物品付運去澳洲，嗰箱物品聲稱係一個過濾器同埋一本書，當DHL後嚟用X光檢查該箱物品嘅時候發覺有異，通知咗海關，海關安排同DHL進行聯合行動，DHL打電話畀被告人，要求佢前嚟辦理一啲手續，當被告人到咗DHL辦公室嘅時候，一名喬裝嘅關員接待佢，當被告人辦好手續之後被另一名關員拘捕。被告人安排運送嘅物品的確係一個濾水器同埋活性炭，不過濾水器嘅組件裡面藏有本案公訴書裡面所述嘅危險藥物，即係內含950克甲基苯丙胺鹽酸鹽嘅991克晶體。被捕之後，被告人喺警誡之下表示佢受人指示喺西鐵站攞到嗰包包裹，喺付運之後佢會得到3,000元嘅酬勞。

被告人現年23歲，未婚，佢中四程度，曾經任職廚房助理、銷售員同埋侍應生，被捕嘅時候每月入息大概11,000元，佢曾經喺2012年9月因為一項管有危險藥物罪被判入戒毒所接受治療。

辯方許大律師喺求情嘅時候強調呢次係被告人第一次干犯販運危險藥物罪，佢現時嘅年紀尚算輕，被告人只係被不良嘅朋友利用，先至干犯本案，干犯嘅手法並不高明，佢亦都強調被告人承認控罪，而家已經深感悔意，被告人亦都曾經向海關合作，並且提供咗一啲資料，佢亦都強調被告人係一名顧家嘅人，但係因為染上毒癮，先至係被朋友利用，干犯本案。辯方亦都交咗被告人親筆書寫嘅一封求情信。

本案涉及嘅毒品係「冰」毒，被告人販運嘅份量係內含950克甲基苯丙胺鹽酸鹽嘅991克晶狀固體。本案發生於2014年11月，香港特別行政區訴譚伊真（CACC 524/2011）一案係適用嘅，雖然嗰宗案件並非係量刑指引，但係根據該案，如果販運「冰」毒嘅純含量超過600克嘅話，Abdallah（[2009] 2 HKLRD 437）一案嘅量刑指引係應該被採用嘅，根據Abdallah一案，毒品純含量係600至到1,200克嘅話，應該考慮採用嘅量刑基準係20至23年。

喺本案，被告人將危險藥物從香港運往外地係一項加刑嘅因素，量刑基準應該因此提高18個月，本席認為一個二十三年三個月嘅量刑基準喺本案嚟講先可以足夠反映被告人嘅罪責。被告人承認控罪，應該得到三分一嘅刑期扣減。考慮過整體情況，包括辯方大律師為被告人所講嘅一切，本席信納被告人曾經向海關提供資料，但係直至現階段，冇證據顯示已經有成果。考慮到案例所示嘅考慮因素，本席認為三分一嘅刑期扣減喺現階段嚟講係被告人應得嘅刑期扣減幅度。

被告人，請起立。根據上述理由，本席判你就本案監禁十五年半。