香港特別行政區 訴 李文翰

HCCC 311/2014

香港特別行政區

高等法院

原訟法庭

刑事案件2014年第311號

----------------

----------------------

判刑

以下內容乃法庭數碼錄音謄本

----------------------

官：　

被告人李文翰被控一項販運危險藥物罪，違反香港法例134章《危險藥物條例》第4（1）（a）同埋（3）條。被告人否認控罪，經審訊之後，被陪審團裁定你罪名成立。

睇番案情，案情就係指喺今年2014年1月14號，當時被告人住一架貨車，喺下鄉道29號出面停咗嘅，咁而嗰時，貨車嗰個車匙係著咗引擎嘅，而控方第一證人呢個警察就睇到被告人你當時又望左又望右，又將個頭伸出去車出面向後望，同埋亦都係有個身向左邊係稍為彎咗兩至三次。咁控方第一證人跟住就通知咗同事之後，就去到被告人你嗰度，呢個控方第一證人擒上咗嗰個司機位嘅時候，就睇到你嘅手就喺一個開咗嘅紙盒上面，而嗰個袋袋住個紙盒就喺你嘅左手面嘅，而被告人你見到控方第一證人嘅時候，就覺得有啲係驚愕同埋就即刻縮手，咁控方第一證人就叫被告人你唔好喐，跟住就話畀你聽佢係警方嘅人員，亦都叫你熄咗嗰個車匙嘅。然後後來控方第四證人就係取代咗控方第一證人去睇住嗰個車門，咁控方第一證人就走到去左邊嗰面，即係架車嘅左面，就係從警長嗰度就取代咗警長嗰個位置，就去入咗呢一個車嘅車頭嗰個駕駛室嗰度，然後跟住就喺入面就搜，就搜到一個膠袋入面，就後屘係發覺佢入面有紙袋，有呢個紙盒，紙盒入面最後係發現到有十二包呢個當時係懷疑嘅危險藥物，而後屘係發現到呢件案件涉及嘅氯胺酮。咁呢啲十二包嘅危險藥物係擠喺四個封咗口嘅錫紙袋入面。

佢拉咗被告人你，就話你係販運危險藥物，咁就警誡咗被告人你，被告人喺警誡之下就係冇講任何嘢嘅，冇任何嘅回應。咁後來控方第一證人就搜你嘅身，就喺身上面就搵到有銀紙，有14,000鈫喺你左邊個袋，咁而面額就係1,000鈫同埋500鈫紙嚟嘅。後屘再搜嗰個車嘅時候，就唔發覺有其他嘅可疑嘅物品。咁嗰十二包嘅當時懷疑嘅危險藥物，最後就經過化驗，證明到係2.88個公斤嘅粉末，而呢啲粉末入面係載住2.24公斤嘅氯胺酮，市價就係三十五萬多嘅。咁好喇，呢個就係呢件案件嘅案情。

咁而你嘅背景喇，被告人就34歲，喺案發嘅時候就係做中港嘅跨境司機，未婚，但係同以前個女朋友就有一個仔。有三次刑事紀錄，一次喺1997年就係偷嘢嘅，另一次就係喺1999年係嗰啲管有淫褻性嘅物品，而最後一次就係喺2010年就係即係冇清關嗰啲嘢咁嘅，全部啲罪名都係罰款或者係有一次就係需要接受感化令嘅，即係話被告人從來未試過因為犯事係坐監嘅。

好喇，講番而家呢個判刑。販運危險藥物係非常之嚴重嘅罪行，而且一經罪成之後，係判得好重嘅。以氯胺酮嚟計，上訴庭已經喺一宗許守城[2009] 1 HKLRD 1案件畀咗量刑指引，如果販運氯胺酮超過1公斤，起點係14年，而喺另外一宗上訴庭案件，就係頭先剛剛主控遞畀我睇嘅單松健[2013] 1 HKLRD 622案件，係2011年嘅案件，喺嗰件案件，上訴庭直情講埋如果你販運兩公斤或者3公斤，即係比起呢個1公斤係兩倍或者三倍量刑就唔應該少過--如果兩公斤就唔應該少過18年，如果係3公斤就唔應該少過20年。

考慮咗呢件案件頭先講過嗰個案情，同埋而家涉及嘅氯胺酮嘅份量係稍為超過兩公斤嘅2.24公斤，咁我考慮咗之後，就以18年為量刑起點。量刑起點嘅意思，即係話被告人係冇案底嘅，又冇其他加刑因素，又冇其他減刑因素，咁叫做量刑起點，就係18年。不過雖然被告人你有三次嘅案底，但係呢三次案底睇落都唔係咁嚴重嘅情況，同埋你係第一次干犯同毒品有關嘅案件，所以我就當你係冇案底。我亦都睇唔到呢件案件除咗案情之外，有其他加刑因素或者係減刑因素，所以量刑嘅基準就係18年。

咁以18年嚟計，因為被告人你係選擇唔認罪，係經審訊之後，被陪審員裁定罪名成立，變咗就冇因為認罪嘅扣減喇，咁亦都睇唔到有其他嘅理由、又或者係你代表律師有畀到其他理由可以將刑期扣減，所以，而家你被判罪名成立嘅販運危險藥物罪，被告人你要坐18年監。