香港特別行政區 訴 鍾寶城
|
HCCC 353/2014 香港特別行政區 高等法院 原訟法庭 刑事案件2014年第353號 ----------------
----------------
---------------------- 判刑 ---------------------- 官： 本案原本有兩名被告人，鍾寶城係案中嘅第二被告人，佢較早前喺本席席前承認咗一項販運危險藥物罪，喺判處嘅時候，本席考慮咗整體情況，包括案件嘅性質同埋情節，被告人嘅個人背景，同埋辯方大律師嘅求情陳詞。 本案嘅案情係簡單嘅，被告人為著每盒400元嘅報酬，運送咗內藏氯胺酮嘅八盒iPhone盒，嗰啲iPhone盒由本案原本嘅第一被告人存放咗喺信德中心嘅公共儲物櫃之內，被告人得知開啟密碼，送貨地區同埋聯絡人嘅電話號碼之後，喺信德中心攞咗嗰八盒「K仔」，前往香港仔華貴邨，喺嗰度畀海關關員拘捕。被告人販運嘅係一共係內含1.45公斤氯胺酮嘅1.92公斤固體同埋粉末。 被告人現時剛剛17歲，喺犯案嘅時候不足16歲，佢係單身嘅，初中學業程度，案發時並無就業。被告人並無刑事定罪紀錄，喺2012年，佢因為不誠實取用電腦被警司警誡。 辯方謝大律師喺求情嘅時候指出被告人干犯本案嘅時候年齡不足16歲，佢並冇刑事定罪紀錄，佢嘅本質不壞，亦都盡心照顧佢視力不良嘅父親，只係受咗利用而犯案，被告人承認控罪，現在已經有真誠悔意，決意改過自新，亦都曾經為控方作證。 根據許守城（[2009] 1 HKLRD 1）一案，販運氯胺酮嘅人，如果毒品純含量超過一公斤嘅話，應該考慮判處14年以上嘅監禁，上訴法庭喺單松健（CACC 458/2011）一案指出，如果毒品純含量為兩公斤嘅話，可以考慮判處18年監禁。上訴法庭喺呢宗案件雖然並非訂下量刑指引，但係具參考作用。 考慮過整體情況，本席認為喺本案採用十五年半作為量刑基準係恰當嘅，被告人承認控罪，應該因此得到三分一嘅刑期扣減。被告人喺犯事嘅時候仲未足16歲，並冇刑事定罪紀錄，本席認為可以酌量減刑。被告人喺本案曾經出庭為控方作證，佢嘅證詞，本席認為其實對控方幫助不大，但畢竟控方讓佢成為控方證人，而佢嘅證詞亦都冇偏離佢畀海關嘅證人供詞，咁嘅情況，法庭理應顧及。 被告人請起立，考慮咗整體情況，包括上述，本席判你就你承認嘅控罪監禁8年。 |
Cases cited in this judgment