被告人承認咗兩項強姦罪，本席喺判處嘅時候，考慮咗案件嘅整體情況，包括案件嘅性質同埋情節、被告人嘅個人背景、辯方大律師嘅求情陳詞同埋受害人同被告人嘅心理報告。
本案嘅案情可以簡述如下：受害人X現年13歲，被告人係X嘅母親嘅同居男朋友，一家五口（即係被告人、X、X嘅母親、X嘅兄長同埋X嘅母親同被告人誕下現年4歲嘅女兒）一齊住喺同一個單位裡面。
2012年9月3日至到2013年1月8日期間嘅某一天，當時屋企裡面只係有X、佢嘅妹妹同埋被告人，當時X同個妹妹玩緊，被告人瞓喺床上面叫X上床，被告人除咗自己嘅衣服，拉低咗X嘅褲同埋內褲，同X性交，X反抗，但係因為被告人壓住佢嘅手腕，所以未能夠逃脫，雖然X叫被告人唔好侵犯她，但係被告人繼續，之後被告人對X講呢個係佢哋兩個人之間嘅秘密，叫X唔好話畀佢母親聽，當時X得11歲。
2013年7月某日，家中亦都係只係得X、妹妹同埋被告人，X喺床上面用電腦，妹妹係瞓緊覺，被告人坐喺X嘅身旁，抱住X嘅腰部，叫X瞓喺床上面，被告人除咗自己嘅衣服同埋X嘅褲，將陰莖放咗入去X嘅陰道，X反抗，叫被告人停止，但係被告人並冇理會，X當時至多剛剛12歲或者可能未夠12歲。
2013年9月初，X嘅母親發現X同被告人嘅行為同埋相處不尋常，詢問X，得知X曾經被被告人侵犯，當佢同被告人對峙嘅時候，被告人承認曾經侵犯X。
被告人現年46歲，中五畢業，佢曾經四十一次被定罪，第一次喺1983年，當時15歲，因為管有攻擊性武器，被判感化，期後喺1987年至到2006年期間不時犯事，係監獄嘅常客，佢干犯嘅罪行多數同管有危險藥物有關，亦都好多係同盜竊有關，亦都有發布淫褻物品、普通襲擊、聲稱係三合會成員、遊盪同埋處理未完稅貨品等罪行，最後一次被定罪喺2010年7月，因為聲稱三合會成員，被判監禁4個星期。
X喺被侵犯嗰段日子情緒大受困擾，上課嘅時候發白日夢，容易發脾氣，晚上喺床上面時常都偷偷哭泣，幸而到咗而家，心理學家發現X已經冇心理上嘅障礙，看來係因為得到母親嘅關懷，X嘅心理狀況已經大為好轉，正如X自己向心理學家表示，佢之前好似活喺地獄裡面，現在已經身在天堂，不再恐懼，亦都再冇痛苦。
心理學家亦都就被告人撰寫報告，佢指出被告人冇精神健康問題，但係認為佢冇責任感，係自我中心嘅人，而且被告人為人衝動，缺乏自控能力，佢干犯咗罪行，但係對受害人冇同情之心，心理學家搵唔到被告人有孌童癖嘅跡象，並且指出雖然被告人守法之心不強，但係再次干犯性罪行嘅風險不高。
報告述及被告人向心理學家講咗嘅一啲說話，呢啲說話嘅內容同被告人嘅認罪答辯不符，喺今日辯方吳大律師告訴法庭，佢喺聽取咗被告人嘅指示之後，確認呢個只係被告人同心理學家喺溝通上嘅誤會，被告人確認佢承認兩項控罪同埋佢所承認嘅案情係屬實。
吳大律師喺求情嘅時候指出，被告人承認控罪已經有真誠悔意，佢亦都擔心X嘅母親獨力養育三名子女，擔子會好重，佢希望可以早日出獄，分擔X嘅母親嘅負擔。吳大律師亦都請法庭接納被告人只係喺一時衝動之下犯案，並且指出雖然被告人有多項刑事定罪紀錄，但係佢已經有數年冇再犯事。辯方呈遞咗被告人撰寫嘅信件同埋X嘅母親寫嘅信件，喺信件裡面，被告人表示佢已經深切反省，十分內疚，會重新做人，X嘅母親亦都替被告人求情，喺表示痛心同埋失望之餘，佢希望法庭可以從輕發落。
吳大律師呈交咗以下三宗案例供法庭參考：R v Chow Kan Shing（CACC 205/1995）、香港特別行政區訴曾震宇（CACC 17/2000）、HKSAR v Tam Kam Fai（CACC 329/2001），吳大律師指出咗，呢啲案件裡面嘅案情同埋考慮方向與本案嘅異同。
英國上訴法庭喺R v Billam（[1986] 1 All ER 985）指出，喺各項性罪行裡面，強姦係最嚴重嘅，因為除咗對事主會帶來身體上嘅可能傷害之外，對佢嘅個性同埋人格都可能會有不同程度嘅損害。
除咗吳大律師提供嘅案例之外，本席亦都參考咗以下嘅案例：HKSAR v KKK（CACC 504/2011）、香港特別行政區訴曾昭德（CACC 386/2011）同埋香港特別行政區訴吳家健（CACC 328/2010）。
被告人喺事發嘅時候四十多歲，佢兩次侵犯一名年紀係十一二歲嘅女孩X，X當時十分年幼，處於不能夠保護自己，容易受到傷害嘅年齡，亦都因為佢年幼，不得不同被告人一起居住，難以逃避侵犯。被告人係X嘅母親嘅同居男朋友，雖然並非係X嘅生父，但係X稱呼佢為父親，被告人以長輩嘅身分欺凌X係為咗佢滿足自己嘅性慾，雖然被告人向來都對X唔好，但係基於佢哋嘅關係，兩人之間始終存在信任嘅關係。喺兩次嘅侵犯事件，X都曾經反抗，但係被被告人制服，明顯兩個人嘅力量懸殊，X曾經要求停止，但係被告人並冇理會。兩次強姦不涉變態嘅行為，或者被告人曾經做出強姦以外令X更加恥辱嘅行為。但係喺兩次事件，被告人都係喺另一名女兒在場嘅時候侵犯X，雖然嗰名女兒當時只係得4歲，但係被告人呢個舉動係完全不理X嘅感受，亦都冇顧及對另一名女兒嘅可能嘅影響。
被強姦嘅受害人嘅心理創傷，唔需要證據亦都可以預期，尤其係X受侵犯嘅時候咁年幼，可幸嘅就係看來佢已經步出陰霾，若非得到母親嘅關懷同愛護，恢復未必可以咁理想。不過正如上訴法庭喺HKSAR v Tam Kam Fai（CACC 329/2001）一案指出，要評估喺呢類事件對受害人嘅長遠影響，有時係難以說得準，因此事件對咁年幼嘅受害人造成嘅心理影響係不能夠輕視嘅。喺第一次侵犯之後，被告人要X唔好話畀母親聽，呢一個畀X帶嚟沉重嘅壓力，X為咗唔想母親擔心，亦都恐怕講出嚟被告人會向佢同埋佢母親報復，X啞忍咗一段長嘅時間。事件對X嘅母親亦都帶嚟沉重嘅壓力。
喺呢類案件，侵犯者有冇用避孕套係重要嘅考慮之一，因為如果冇用嘅話會帶嚟懷孕同埋傳染疾病嘅風險。被告人喺兩次事件都冇用避孕套，幸而事實上X並冇因此懷孕或者染病。
考慮咗整體情況，尤其是顧及被告人同X嘅關係，與及X被侵犯嘅時候只係得十一二歲，十分年幼，本席就每項控罪採用12年作為量刑基準。被告人承認控罪，應該得到三分一嘅刑期扣減，除此之外，本席不見有其他足可減刑嘅因素。從心理學家嘅報告可見，即使接受只係喺溝通上面可能出現誤會，被告人難稱有真誠嘅悔意，但係畢竟被告人承認控罪，免卻咗X要承受喺法庭作證嘅壓力同埋對心理造成嘅可能影響，本席認為可以給予被告人三分一嘅刑期扣減。
被告人，請起立，基於上述理由，本席判你就每項控罪，監禁8年。你喺一年之內兩次強姦X，顧及整體量刑，引用上訴法庭喺HKSAR v Ngai Yiu Ching一案嘅考慮原則，本席命令第二控罪嘅刑期裡面其中6個月同第一控罪嘅刑期分期執行。總括嚟講，你就兩項控罪要監禁總共八年半。